Zakaria Lalhriattluanga tual thihna chungchanga lungawi lovin New Builum khawtlang mipuite chu Thawhlehni chawhnu khan Kolasib District Jail, Saidan bulah an pungkhawm.
Pungkhawmte hian police-in he tualthihna chungchanga hnu chhui mek leh tualthattute kim taka man thlenga hma laka an hming pawh mipui hriata puanzar tur te, home minister-in tun thlenga thawm a la nei lo chu mak an tih thu te, tualthattute chu khai hlum ni rawh se tiin an au rual.
Mipui ngenna angin police chuan tualthihna chungchanga mi an man mek hmingte chu an puang a. Hetih lai hian pungkhawmte chuan an hmel hmuh phut chhunzawm lehin police leh khawtlang hruaitute nen an sawiho a ni.
Tar lan tawh angin, Pathianni zan thim hlim khan Kolasib district chhunga Bualpui Coffee huan bula intihbuaina thlengah Zakaria Lalhriattluanga a thi a. He tual thihna avangin Police-te chuan mi paruk an man tawh a, an zingah hian hmeichhe pakhat a tel a ni.
An mi mante hi Police custody-ah awm mekin thuzawh fiah mek an ni a, Kolasib District Court-a hruai an nih hnuah District Jail-ah dah nghal an ni.