Aizawl: Accessible India Campaign (Sugamya Bharat Abhiyan) kalpui mekah State Commissioner for Persons with Disabilities Vanlaldiki Sailo hova audit team-te chuan Aizawl khawpui chhunga biak in hrang hrangte rualbanlo (PwD)-te vantlang hmunhma awlsam taka an luh leh chhuah theihna tura awlsamna remchang siam dan an endik.
He Access Audit-ah hian Ramhlun North Presbyterian Kohhran; Ramhlun North BCM; St. Francis of Assisi Church, Durtlang; Leitan Presbyterian Kohhran; Salvation Army Durtlang Corps leh Durtlang Presbyterian Kohhran te tlawh a ni.
Commissioner Vanlaldiki Sailo chuan ‘The Rights of Persons with Disabilities Act, 2016’ in a duan angin sorkar laipui chuan mi tin, a bikin rualbanlote’n vantlang hmunhma awlsam taka an luh leh chhuah a ngai pawimawh tih a sawi a. Biak in, school, office, damdawi in leh vantlang veivahna hmun hrang hrangte hi rualbanlote tana tluang taka an hman theih tur a nih avangin thupek khauh tak tak chhuah a ni a; biak in sak mek leh siam that ngai awm ang angte chu kohhran hrang hrang hnenah ziaka pek a nih tur thu a sawi.
Commissioner hian kohhranten rualbanlote tana hma an lo lak tawhna zawng zawngah lawmthu sawiin, PwD office chuan Mizoram district zawng zawng an tlawh chhuah tawh thu leh District Administration kaihhruainain district hrang hrangah Access Audit hi chak taka kalpui mek a nih thu a sawi bawk.
Audit team-ah hian PwD Office thawktute bakah Aizawl Municipal Corporation (AMC), PWD leh DIPR aiawhte an tel a, an kalna kohhran hruaitute hnenah ‘The Rights of Persons with Disabilities Act, 2016’ Mizo tawnga lehlin bu thum theuh an hlan nghal bawk.