Aizawl: Health Minister Lalrinpuii chuan mipuite hriselna chawikan chu sorkar ngaih pawimawh berte zinga mi a nih thu sawiin, tunlai damdawi chauh rinchhan lovin, hnamzia leh ram leilung nena inrem Ayurveda leh AYUSH system-te chu theihtawpa chhawm nun leh chawikan zel an tum tih a sawi.
Nilaini khan Central YMA Hall, Tuikhuahtlang-ah health minister chuan 11th Ayurveda Day 2026 lawmna a hmanpui a. An nunphung inthlak hlawk avanga zunthlum, thisen sang, cancer leh lung natna hluar mek laka invenna atan Ayurveda thuken — natna laka inven hmasak, taksa, rilru leh leilung inrem taka nunho hi a chhanna pawimawh tak a nih thu a sawi.
Kumin Ayurveda Day thupui, ‘Ayurveda for a healthier tomorrow’ (Hma hun hrisel zawk atan Ayurveda) tih chu tunlai khawvel nen a inmil hle nia a hriat thu sawiin, Mizoram chu ramhmul damdawia a hausak em avangin ni tin nunah Ayurveda zirtirna seng lut zawk turin a chah.
Minister chuan modern medicine chauh rinchhan lo va, an hnam zia leh leilung nena inrem Ayurveda leh AYUSH system-te theih tawpa chhawm nun leh chawikan zel sorkar tum dan a nih thu a sawi. Sorkar laipui leh Mizoram sorkawr hmalaknain National Ayush Mission kaltlangin Ayush Health & Wellness Centre-te din a ni a, mi tin ban phaka Ayush doctor an awm ta chu ram hmasawnna lian tak a ni, a ti.
Lalrinpuii chuan Ayurveda damdawi hman a nihin a dik, a him leh a tha ber chauh mipuite hnen a thlen theih nan AYUSH doctor leh health worker-ten mawhphurhna lian tak an nei a, mipuite rintlaka kalpui zel a tul tih a sawi bawk.