Aizawl: Aizawl District Bawrhsap Er.Lalhriatpuia, IAS chuan Ningani khan kum 7 chhung Treasury Square leh a chhehvela chhum lo chat lova ruihhlo leh sual rem theih nana lo duty tawh mi 15-te chu an inpekna an ngaihhlutzia lantir nan chawimawina thuziak (Letter of Appreciation) pein an thingpui inna tur Rs. 15,000 a hlan.
Er. Lalhriatpuia chuan “Kan lawmthu sawina hi beitham hle mah se, khawtlang tana in inpeknaa kan lawmzia, hlutzia leh ngaihsanzia che u lantirna (Token of Appreciation) a nih avangin min pawmsak ngei ka beisei a, in kal zelna turah district thuneitute chuan duhsakna sang ber a hlan che u a ni,” a ti.
Bawrhsap chuan, “Tun hnaiah Mizoram dung leh vangah ruihhlo a hluar em em a, a dona kawngah nasa taka tanho a tul hle a. Ruihhlo do kawngah Venghlui Paho Zing Duty chuan kum sarih chhung hma in lakna te ka lo hriatin ropui ka ti hle a, in inpekna avangin nasa takin ruihhlo hluar zel tur pawh tihremin a awm ka ring tlat a ni,” a ti.
Venghlui Paho chuan duty hi July 27, 2019 atanga an lo kalpui tawh thu te, a tirah chuan welfare leh section ang tein hma an la tan a, tunah chuan Branch YMA-a OB ni lai leh Ex-OB te nen Paho ten mahni thahnemngaihna atangin an kalpui mek zel tih an sawi. Venghlui Paho chuan an hmalakna DC in a hlutsaka a, a hriatpui chu lawmawm an ti tih an sawi a. DC hnenah Treasury Square leh a chhehvel a lo him zawk theih nana thurawn an neih te an thlen bawk a ni. Letter of Appreciation hi heng a hnuaia Venghlui Paho hnenah hian Aizawl DC chuan a hlan.