Aizawl: Home Minister K. Sapdanga chuan New Builum khua tlawhin mi kut tuara thi, 9 Assam Regiment sipai tanglai, Zakaria Lalhriattluanga chhungte a ral.
He hunah hian Lt. Col. Clement Lalhmingthanga, MLA, Advisor to CM TBC Lalvenchhunga, minister nupui, Darkhumi leh official dangten an tawiawm.
Home minister chuan he tualthihna rapthlak tak avang hian sorkar leh Mizo mipuiin pawi tiin, Zakaria chhungte an lainat takzet tih a sawi a. Sorkar aiawh ngawt ni lovin Mizo nihna anga mi mal taka lainatna lantir tura tlawh an nih thu sawiin pawikhawitute hi police-ten darkar thum chhunga an man thei nghal chu lawmawm a ti a, an phu tawk hremna an hmuh ngei tur thu a sawi.
Lt. Col. Clement Lalhmingthanga pawhin Zakaria chu ram leh hnam tana mi tangkai, thian chhan thih ngama nunna hlan a nih avangin chawimawi tlak a nih thu leh Zoram pumin an sun mek tih a sawi bawk.
Zakaria pa pawhin home minister leh a tawiawmtute chungah lawmthu sawiin, a fapa bungrua leh thawmhnaw rawn thleng tur chu a huphurh hle tih a sawi a. A fapa chu chhungkaw innghahna ber a nih thu leh an in sak lai pawh la zo lova a kalsan thu sawiin, a nau chuan inhlawhfain ei a zawng mek tih a sawi a. Ni ruk chhunga case chhuichhuah a ni chu lawmawm a tih thu sawiin, a fapa thihnaah hian rorelna dik tak an phut thu a sawi.
He hunah hian Home Minister leh MLA pahnihte chuan sorkar atang ni lovin, an mimal tuak khawmin ralna sum an hlan a. Home minister, a nupui leh TBC Lalvenchhunga te hian sunna puan an hlan bawk a ni.
September ni 20 (Pathianni) zan dar 6:20 vela Zakaria Lalhriatluanga, mi kut tuara a thihna chungchangah Mizoram Police chuan rang taka hma la zui nghalin, a thattu nia puh mi pariatte chu September 20 khan an man nghal a. Kawnpui Police Station-ah tualthah thubuai Bharatiya Nyaya Sahita section hrang hrang hnuaiah case an ziak lut a. Zakaria Lalhriattluanga thattu nia puh mi pariat zinga puitling parukte chu September 21 khan Kolasib District Prison & Correctional Home-ah dah luh nghal an ni a, kum tling lo mi pahnihte pawh Observation Home, Thingdawl-ah dah luh nghal an ni bawk.
Heng mite bakah hian thilsual titu a puh mi dang pakhat chu ni September 23 khan man belh lehin, hemi ni vek hian Prison & Correctional Home, Kolasib-ah dah luh leh nghal a ni.