Aizawl: Hnahthial District Volleyball Court-ah MLA Cup Inter Village Tournament kharna hun Inrinni khan hman a ni a. He hun hi South Tuipui bialtu Jeje Lalpekhlua’n khuallian niin a hmanpui a, SDC Pu Lawrence Lalhlanthara chu Khualzahawm niin a hmanpui bawk.
Khuallian Jeje Lalpekhlua chuan Hnahthial district-ah infiammi an tam thu leh tournament pawh huaihawt a tam thin thu sawiin, chutih rualin ram pum huapa infiamna lama tun hmaa hmun pawimawh chang thin te phak loh tum a awm thin thu a sawi a. A chhan ber ni a lan dan chu thangtharten mumal taka zirtirna leh kaihhruaina an dawn that tawk loh vang a nih thu sawiin, tournament-a tel infiammite chu an hnua lo kal zel turte tana entawn tlaka nung tlat turin a chah.
Infiammite chu zuk leh hmuam bakah ei leh in thleng a insum hram hram tura chahin, Hnahthial hmasawnna atan ‘Empowering Mizoram Sports’ hnuaia coach tha chah luh theihna ruahmanna te lo belchiang turin a chah nghal bawk.
Inelna neihna Hnahthial District Volleyball Court chungchang sawiin, MLA chuan he hmun hi Semi-Indoor Court-a siam tum a nih thu leh chumi atan chuan hmalak mek a nih thu a sawi a. Tun dinhmunah Pavillion sak thar a nih tawh bakah Volleyball Court pawh chei that a nih tawh thu a sawi bawk.