- Dr. J.T.V.L. Ngheta
Dt 24.8.2026 khan ZPM V.U.C atangin Pu Bualhranga leh Pu Rin Sanga IAS (Rtd)-te an ban chungchanga ngaih dan sawi (comment) hrang hrang social media a mi ka lo hmu a; party mi ka ni lo nain, tlem ka’n sawi ve ang e.
ZPM hian a din tirh, kum 2017 atang khan President an nei tha viau a, an leader nen pawh an thawh hona a tha a ni; 2023-a an chak chhan pawh an leader Pu Lalduhona leh Pu Sawta-te thawh hona that vang a ni a; a mi mal pawhin han sawi ila, Pu Duhoma rihna hi ni bawk mah se, an President Upa Lalliansawta-a mipuiin rinna an nghah vang a ni thui hle ang.
Pu Sawta hi a sawrkar hna thawh lai ‘Assistant Grade’ bansana hun puma Pathian rawng bawl tura inpe, mi ti mai mai lo, piang thar tha, pension thak thlenga Synod hnuaia thawk kha a ni a. London-ah pawh kum 1 zet Synod tirha finanve training nei tawh a ni bawk. Presbyterian Kohhran Synod Ram Thar Board Secretary-ah pawh amah chauh hi kohhran Upa niin, a hmasaber leh hnuhnung ber a ni hial. Ro rel a thiam a, leadership quality a nei tha a, dik taka thawk mi; ama chhungkua ngei pawh duhsak bik chuang lo ngam a ni. A duh ber chu ro relna tha leh dik a ni ringawt mai; hei hi Party-a a awm chhan pawh niin a ngaih theih. ZPM Golden President tiin sawi ila, a inhmeh viau awm e.
Amaherawhchu, mihringte thu ni hek suh le; hrisel tha chu ni se party hruai nana upa lutuk pawh a la ni lo nachungin, a hrisel ta lo em em mai hi a pawi ta ber chu a ni; ZPM tan van pui a chim hi a ni ringawt mai.
CM bak, mi phan chang leh tawn hriat ngah bawk si Pu Sawta han têr pha tu mah dang an awm hmel si lo a, CM-in President nihna a chelh ngawt loh chuan ZPM hian a tlak hniam phah ngeia ringtu an thahnem hle a. Chuvangin, CM Lalduhoma hian President nihna a chelh a lo ngai ta niin a lang.
A tira an principle kha one man one post ni mah sela, hetia Pu Sawta berin a theih lohsan tak si-ah chuan CM-in leader nihna nena a kawp hi a tul ta hle niin a lang; hriat thiam loh tur a awm lo. Chutih laiin, mi principle nei tha, mi ti mai mai lo leh, tuna dam laiah chuan, dikna kawngah te, mahni inthunun theihna kawngah te, hnam hmangaihna kawngah te, mahni thawh rim rah hmanga a taka mi harsate chhawmdawlna lama luan chhuahna kawngah te, a taka corruption fo ngam kawngah te, mahni awmna kohhran bakah kohhran dangte pawh a taka tanpuina kawngah te leh mi retheite tawrhna thlen thei nia a hriat avang leh mahni inhai vur bikna lam rawng kai nia a hriat avanga kum 1999-a MLA Pension tih san pawh la lo ngam khawpa huaisenna kawngah te amah ang hi Zoram khawvelah awm awm tak ang maw tih hial tura ngaih Pu Bualhranga leh, direct recruit IAS nihna anga service laia hna thawk tha, chhuanawm leh hlemhle lo tak mai Pu Rin Sanga-te’n ZPM V.U.C.atanga banna an theh lut pawh hi demna tur an awm chuang lo a ni. Thil hre chiang mang lo leh kum upate zah lohna rawngkaia thil sawi zui vak vak hi chîn tam loh a tha hle.
Eng pawh ni se, Pu Lalliansawta’n Party a kaihhruai dan anga ZPM President hian a kaihhruai chuan 2028 inthlan puiah pawh an ngaihtuahawm lo vang; chutih laiin, Pu Sawta kal dan phung atanga an per hlat viau erawh chuan ngaihtuahawm tak an ni thei thung. Upa Lalliansawta atanga zir theih awm ang angte zir chung zelin ZPM hi fimkhur thiam takin kal zel sela, an la sawrkar rei loh ngaihtuahin, hna an la thawk tha rih hle niin a lang a nen, inthlan pui lo awm leh turah pawh an ngaihtuah awm lo vang.