Union Minister Ramdas Athawale-a chuan electoral roll ennawnna, Special Intensive Revision (SIR) kalpui chungchangah eptute nawrna avangin Chief Election Commissioner (CEC) Gyanesh Kumar-a chu a bâng dawn dawn lo tih a sawi a, mipui rorelnaah langtlang taka electoral roll a awm chu eptute zawk hian an duh lo niin a puh let.
Athawale-a chuan election commission chuan tumah thlei bik nei lovin, an tih tur leh inthlan chu langtlang takin an buaipui tih a sawi a. Election commissioner pahnih leh CEC Kumar-a inkarah inmil lohna a awm lo niin a sawi bawk.
“Election commission hi danpui tlawhchhana pawl (body) hrang hlaka din a ni a. CEC bân an duh a, mipui rorelna kaltlanga langtlang taka electoral roll kalpui hi eptuten an duh dan a ni,” tiin BJP kaihhruai tangrual, NDA-a tel ve, RPI (A) chief chuan a sawi.
Kumar-a chu eptute nawrna avang mai maia bâng a ni lo tih a sawi bawk.
Congress leh party dang eng emaw zat chuan CEC Kumar-a hi tun hnaia The Indian Express chanchinbuin a chhuina a tihchhuahah SIR kalpuiah election commissioner pahnihten thla 10 chhungin vawi 14 vel an hnial tih a tar lan atangin bâng turin an nawr nasa hle.
Election commission-ah hian member pathum awmin inlungrual tak zelin thutlukna siam tur an ni a, pahnihin hotu ber an hnial hi thil thleng ngai lo a ni a. A hnuah commission chuan thutlukna chu member-te karah duh dan inang lo chu a awm ve thin ngei a; mahse, SIR kalpui pawh telin, thutlukna zawng zawng lungrual tak veka siam a ni tih a tar lang.
Athawale-a chuan electoral roll ennawn chu inthlanna langtlang a awm theih nena tih ngei ngai a nih thu leh voter thi tawhte hming paih ngei ngei a ngai niin a sawi.
Prime Minister Narendra Modi-a sorkara social justice & empowerment minister hian chhungkaw tlem taka voter 40 chuang awmna ang chi erawh chhui chian ngai a nih thu a sawi bawk.
Athewale-a hian Cockroach Janta Party (CJP)-in CEC a bân an phut chungchangah pawh an pawl chu ‘Rajinama Janata Party’ tiin an hming thlak se a ti, a hmaa Union Education Minister Dharmendra Pradhan-a a bân an phut tawhna sawi langin, “Eng hunah pawh tu emaw bân phut ringawt hi dikna chanvo a ni lo,” a ti.