Aizawl: Tourism Minister Lalnghinglova Hmar chuan tun digital leh AI khawvelah thlalak leh video kaltlangin Mizo nun ze mawi leh Mizoram mawina pho lang turin mi tin an pawimawh thu a sawi.
Tourism department buatsaihin Thawhtanni chawhnu khan tourism ninister chuan Zo Hall, Chaltlang Tourist Lodge Annex-ah World Tourism Day 2026 lawmna hun khuallian niin a hmanpui a. Kumin World Tourism Day thupui atan ‘Digital Agenda & Artificial Intelligence to redesigning tourism’ tih hman a ni.
Lalnghinglova Hmar chuan Mizo culture leh sakhuana humhalh tlat chunga khualzin mite dawngsawng tur leh Mizoram chu tourist destination lian zawka an hlan kai theih nana theihtawp chhuah tlan a tul thu a sawi a. Festival thleng chho zel tur — Anthurium Festival (October 1-3, Reiek leh Ailawng), Travel Fest, Hnahsin Kût (Champhai), Leitlangpui Festival leh Winter Festival-ahte a tam thei ang ber tel turin mipui a sawm a, ram chhung hmun mawi tak takte tlawha social media-a thehdarh uar turin a chah.
Minister chuan Mizoram chu chhungkuaa tlawh tlak, hmun ralmuang leh him a nih a ngai tih a sawi a. Thlenna inte pawh thianghlim leh fai taka awmin dan anga inziak lut theuh tura inzirtirna uar a tul thu a sawi a. Mizo nunze mawi lantira khualzinmite tha taka lo hmuak tur leh Mizoram hi khualzin mite tlawh chak ber ram a nih theih nana an theihna zawn theuha tangrual turin World Tourism Day pual hian mipui a sawm a ni.
Inkhawmah hian ‘Responsible Travel Pledge’ (intiamkamna) neih a nih hnuah Mizoram Tourism Excellence Award 2026 dawngtute hi puan a ni.