Aizawl: Lai puan humhalh leh tihhmasawn chungchang zirhona, Government Aizawl West College auditorium-ah neih a ni.
Thawhlehni khan Department of History leh Research Development Cell–IQAC te tangkawp buatsaihin ‘Evolution of Textiles in Mizoram: A Focus on Lai Textile Heritage’ tih thupui hmangin State Level Workshop neih a ni a. He hunah hian khuallian, Lai Autonomous District Council (LADC) Chief Executive Member C. Lalsawmzuala chuan Lai puan leh hnam thuamte humhalh, zir chian leh ziaka chhinchhiah kawnga tan lak lehzual a tul thu leh, cultural heritage te chu innek nan hmang lova inpumkhatna atana hman a tul thu a sawi.
C. Lalsawmzuala chuan pi leh pute puantah leh la deh thiamna ropui tak sawiin, kum 1855-a Lai hnam puan tah phei chu Victoria & Albert Museum, London thlengin a awm thu leh hetah hian silk an lo hmang daih tawh tih a sawi a. Hnika, Khuptangtial, Nawnthum hni, Chawngnak, Canlo leh Biarpi te chu Lai hnam nunphung leh kut themthiamna tilangtu an nih thu sawiin, Lai hnam thuam zirna hetiang taka Mizorama neih a ni ta chu a hmasak ber a nih hial tur thu a sawi.
Khawl changkang a lo chhuah zel lai hian pi leh pute puantah dan leh a nihna tak (authenticity) humhalh a pawimawh hle a ni, a ti bawk.
LADC CEM chuan Lai puan ziaka chhinchhiah mai bakah puantah thiamte kawmna video siam te, handloom fair leh exhibition te neih tam a, designer-te nen thawhho zel a tum thu a sawi a. Sorkar laipui puihna hmangin LADC chhungah ‘Lai Textile Heritage Village’ din theih dan zawn a tum thu a sawi bawk.