Aizawl: MNF Treasurer Lalruatkima chuan Mizo hnam damna leh himna hi an thupui ber ni fo se a duh thu a sawi.
Thawhlehni khan Tuirial-ah Aizawl East-I Block MNF tlawhchhuah puala inkhawm buatsaih hmanpuitu Lalruatkima chuan, MNF chu Zofate rorelna pakhat hnuaia awm tura hma la mek an nih tlat avangin, Mizo hnam damna leh himna chu an thupui ber a nih reng a tul thu leh, kum 1966-a Mizo Nationalism, huaisenna leh inpekna rilru kha kaihharh thar a tul leh ta hle a ni tih a sawi.
Lalruatkima chuan MNF-in luipui kama chengte hamthatna leh dam khawchhuahna an theihnghilh ngai loh thu sawiin, forest thenkhatin midangte zalenna a khuahkhirh mek avanga harsatna awm te sukiang turin theihtawp an chhuah zel dawn tih a sawi a. Mipui rilruah MNF chu a rinawm, a rinngam leh a taima tih hriat tir zel tura mi mal nun siamthat a tul thu te, hnam rilru pu reng sia MNF la zawm lo te sawm khawm chu party hruaitute mawhphurhna a nih thu a sawi bawk.
AMC sorkar hmasak laia hna thawh leh ruahmanna thenkhat te ZPM-in thuneihna an lak hnuah an tikhaihlak nia an hriat thu leh, SASCI atanga sum puk pawh MNF leh Congress Ward-te thlei bikin an sem ve duh lo nia sawiin, an hmalak dan chu zahthlak a tih thu a sawi. MNF-in sorkarna an chang leh a nih chuan thleibik nei lo, mi zawng zawng huap sorkar an din dawn tih a sawi a ni.