Aizawl: Khawvel puma lung lam hriselna ni (World Heart Day) hmanna pualin Indian Army 457 Field Hospital leh Rotary Club of Aizawl te chuan Thawhlehni khan Mizo High School leh Govt. Hrangbana College-ah ‘MISSION 10,000 CPR & Heart Awareness Initiative’ tih hming hmangin zirtirna hun an hmang.
He hunah hian lung lam hriselna ngaihpawimawh a tulzia leh lung lama harsatna nei thut te enkawl dan tur zirtirna pek an ni a. Indian Army 457 Field Hospital-te’n First Aid, chhiatrup thil thleng thuta hmalak dan leh nunna chhanhim a nih theihna tura an tawnhriat leh thiamnate chhawr tangkaiin, lungphu chawl thut an awm dawna hmalak dan (CPR) te an zirtir a ni.
He hmalakna hian a tum ber chu lungphu chawl thut leh harsatna thleng thutah te rang taka che chhuak thei tura mipui leh zirlaite chher chhuah leh mahni remchanna zawn atanga nunna chhanhim theihna thiamna hman tangkai a ni.