Mizoten thih dan pangngai lova thi tia kan sawi mai thin hi a thleng ta mawlh mawlh mai a, kumin chhung ringawt pawhin tam tak a awm tawh a, nunna kan inchan mawlh mawlh reng mai hi a pawi ngawt mai.
Hunpui kan hmachhawn dawn a, mi tam takin kawng hrang hrangin hunpui kan hman nawm theih nan hmalak kan tum leh theuh ngei ang. Kan fimkhur thar a va ngai em.
Sarthi tia kan sawi thin tam tak hi fimkhur deuha pumpelh theih nite pawh hian a lang a, chuvang chuan mitin kan fimkhur thar lehzual a ngai hle mai.
Kan hnam hi kan tam lo a, inlamhnai leh induhsak tham lek kan la nih avang hian thihna tam zawk, kan pumpelh theih nia lang lakah kan fimkhur tlan lehzual a, hunpui hlim taka kan hman theihna tura kan lo inbuatsaih lawk thiam a tul hle.
Chhiatna tam tak hi keimahni chochhuah a nihna lai awm thin mahse, thenkhat hi chu kan pumpelh theih reng a ni ve bawk a, mitin fimkhur thar ila, midangte harsatna thlen zawnga khawsak loh pawh i tum teh ang u.
Harsatna kan tawh hian a pawi tur angin a lo pawi vek tawh zawk thin a, fimkhur theih hun lai hian fimkhur ila, kan hmaa hun pui kan hman tur hrerengin mitinin fimkhurna kawngah tan i la thar leh mawlh teh ang u.