Art & Culture Minister C. Lalsawivunga chuan New Secretariat Complex (MINECO)-a sak zawh fel tak Mizoram State Museum thar chu Nilaini khan a hawng.
Hawnna inkhawmah Minister C. Lalsawivunga chuan Mizoram State Museum hun rei tak atanga hna bul tan a hlawhtlinna a thleng ta chu lawmawm a tih thu sawiin, building sakna leh a chhung ruahmanna tura sum petu Ministry of Culture leh Smart City (UD&PA) te chungah lawmthu a sawi.
Minister chuan museum chu thil hlui dahkhawmna hmun chauh ni lovin hnam nun, chanchin leh rohlu vawn thatna hmun leh hnam identity humhalhna leihlawn pawimawh tak a nih thu a sawi a, Mizoram State Museum hi Multipurpose Museum a nih angin gallery thlur bing bik awm lova chi hrang hrang pakua leh archaeology section pakhat awmna, Mizo history tifiahtu a nih avangin thangtharte leh khualzinte zir chhuahna atan tlawh uar turin mipui a sawm.
Museum a object awm 50% aia tam hi mi inphalten an thil neihte an donate a ni a, chutiang hnam rohlu neite chu museum-a pe ve zel turin Minister chuan a chah bawk.
Mizoram State Museum hi September ni 18, 2007-a sak tan niin, October ni 2, 2012-ah sak zawh fel a ni a, July ni 25, 2019 khan Art & Culture Department hnenah hlan a lo ni tawh a ni.
Hawnna inkhawmah Adviser to CM Lalmuanpuia Punte, MLA, MPSC Chairman, sorkar official pawimawhte, zirlaite an an tel a ni.