Aizawl: Power & Electricity Minister F. Rodingliana chuan Nilaini khan MRT Stockyard, Zuangtui-ah Aizawl chhunga hman tur distribution transformer 276 a vai liam.
He hunah hian P&E Department hotute, engineer-te, thawktute an tel a, transformer-te hi tun hnaia Aizawl khawpuia electric tha lo thin sutkianna tur leh power supply rintlak zawk a awm theih nana sem chhuah tur an ni.
Minister chuan sorkarin power intodelh tura hma a lak dan sawiin reiloteah solar atangin megawatt (MW) 100 thar chhuah theih beiseiawm a nih thu leh Vankal bula Tuichang PSP DPR ennawn mekah pawh MW 350 atanga MW 400 vel siamchhuah beiseiawm a nih thu a sawi.
Hei bakah hian Tuirini-a MW 24 thar chhuak thei tur hnathawh tan mek a nih bakah, MW 132 thar chhuak tur Tuivai pawh Mizoram sorkar ta liau liau tura EPC mode-a kalpui turin thutlukna siam fel a nih tawh thu leh Aizawl Lammualah Gas Insulated Sub-Station (GIS) sak hna tan thuai a nih tur thu a sawi a, he sub-station hian Aizawl khawpui chhung power sem chhuahna rit lutuk nasa takin a chhawk zangkhai dawn tih a sawi.
He huna technical report-a tar lan danin kum 2024 atanga tun sorkar hnuaia department-in power semchhuahna tihchangtlun nana transformer a lei tawh 276 ziangah hian distribution transformer 264, 33/11 kV power transformer pakua leh 132/33 kV power transformer pathumte an tel a ni.