Aizawl: Chief Minister Lalduhoma chuan ATI Auditorium-ah DP & AR leh ATI bultuma buatsaih Mizoram sorkar officer-te tana training ‘Capacity Enhancement Programme’ chu Ningani khan a hawng a, ZPM sorkarah political transfer hi awm lo se an duh thu a sawi.
Chief minister chuan Level 13 leh Level 13A officer-te hmaah intilal vak lo tur leh Mizoah hnam hniam leh hnam sang an awm loh thu sawiin, peon-te pawh khawtlang leh kohhran hruaitu an nih fo thin avangin tu chungah mah intihlal lutuk loh a pawimawh thu a sawi.
Lalduhoma chuan officer-te chu sorkar flagship scheme-te leh Transform Mizoram Vision tihlawhtling tura theihtawp chhuah turin a chah a, hun vawn dik, thlemna hneh, thawhho uar leh positive taka hmalak an pawimawh thu a sawi bawk.
Transfer & posting-ah NGO leh zirlai naupangte inrawlh thin chu thil dik lo a nih thu sawiin chief minister chuan, “Yes Sir tih hun leh No Sir tih hun a awm. Sorkar hnathawk kan nih chuan neutral kan ni tur a ni a. Sorkar lai apiang kan thlawp mai tur a ni. Awn lam nei, eng emaw party tana lo tang ve thin an awm khan political transfer a awm phah thei. Kan sorkarah hi chuan hetiang transfer hi awm lo se kan duh. PAC-a ka awm laia officer thenkhat enquiry kan laknaa kan hmuhchhuah chu an pute laka No ti ngam lo, a tuartu ni zui ta an lo ni duh khawp mai. Inti lo thei lo a nih pawhin ziakin dah thin ang che u,” a ti.
UPSC a tlin hleih theih loh avanga hnam dang officer lo kalte lo kawmngeih leh tha taka lo pawm chu hmasawnna atan a pawimawh thu, chief minister hian a sawi bawk.
Training hawnna inkhawm hi ATI Director Rita Lalnunmawii Pachuau-in lawmthu sawiin a khar a, officer-te hian Leadership Skill, Ethics, leh Artificial Intelligence (AI) chungchangte an zir chhunzawm a ni.