Zing dar 2 chho velah Aizawl khawlai hi han fang teh, emaw a aia hma deuhah pawh a ni thei. Ruihhlo titute fuankhawm i hmu thei ang! Heng mite hi khawpui hulum leh kawtthler rem deuhah hian an tleh dul dul a ni ber a, ngaihmawh tham an ni!
Chu chu zana thleng tur ve rengah i lo ngai pawh a ni thei a, mahse chhunah kan khawpui hulum lai tak Vanapa hall chhehvelah hian lokal leh la, zalen taka ruihhlo titute fuankhawm i hmu thei bawk ang. A then phei chu lo inchiu ta ngawng ngawng te, a bul office thenkhat kawngka tak maia lo thle ta bawih bawihte an awm tam viau.
Kan ram rawh luhchhuahtu khualzin kan ngah telh telh a, heng mite hian social media lamah kan ram chanchin leh an chetvelna hrang hrang an dah nasa tawh hle. Heng ruihhlo ti thinte hi an la hmu fuh lo a ni mai thei a, hmu fuh chunga la dahchhuak lo pawh an ni thei. Kan ram hmel tibal zualtute an ni thei tih kan hriat thar a tul hle.
Ruihhlo leh a kaihhnawih tamna veng nih kan duh lo theuhin a rinawm a, kan tlawmngai pawl lian ber YMA pawhin theihtawpa ruihhlo a do lai leh a dap mek lai hian an kut ngawta dah lovin khawtlang leh vengtin kan tanrual tlan hi a ngai tawh a ni.
Tuna kan khawpui chhunga ruihhlo titute tleh dul dul reng mai hi kan vei a, sorkar pawhin enliam mai lova a tul a nih chuan duty tur a dah pawh a tul viau ta mai. Chhun, tlai, zan thlenga kan khawpui hulum lai taka ruihhlo titute zalen taka an awm fo mai hi a fuh lo a, a tha lova, kan tihthianghlim lehzual a va tul ta em.