Aizawl: MNF Senior Vice President Dr. R. Lalthangliana, MLA chuan MNF sorkar leh hunah mipuite phur tirit lo turin tax leh bill hrang hrang, ration buhfai man a leta pung leh petrol/diesel mante sang ta lutukte hi ennawn a nih tur thu a sawi.
Inrinnia MNF General Headquarters ruahmanna anga Vangpui Fehchhuah hmanga Ailawng, Chungtlang, Rulpuihlim leh Tuahzawl an tlawhnaah he thu hi sawiin, Dampa bialtu MLA Dr. R Lalthangliana chuan lui ruam ram thate chhawr tangkaiin, kut hnathawktuten lei rem an rah a, an inchawikan theihna turin Agriculture Link Road lamah nasa taka hmalak hi MNF a sorkar leh veleh an tum lian berte zinga pakhat a ni, a ti.
MNF sorkar hmasak laia PMGSY leh World Bank fund hmanga kawngpui tam tak an lo sial tawh thute sawiin Dr R Lalthangliana chuan, Reiek Tourist Centre kawng double lane leh Rs nuai 5,000 senna tur Rawpuichhip to Buarpui kawng INCA Company-ten an siam mek te pawh tha taka hna thawh a nih theih nan YMA leh VC-te uluk taka vil zui turin a chah bawk.