India-a eptu party tangrualte chuan Pathianni khan khawpui ber, Delhi-ah electoral roll ennawn kaihhnawihah chief election commissioner (CEC) bân phutin kawng zawh lian tak an huaihawt.
INDIA tangrualte huaihawt hi Congress party hruaitu, Rahul Gandhi-a’n hovin Delhi lailia hmun hriat hlawh tak, Ramlila Maidan-ah politician langsar tak takte nen an pung khawm.
Jeep chung hawn chunga hruaitute hi chuangin a hmun an thlen hian anmahni thlawptu sing telin an lo lawm a. An zingah hian Congress hruaitu Sonia Gandhi leh Mallikarjun Kharge bakah Mamata Banerjee, Akhilesh Yadav leh Tejashwi Yadav te pawh an tel.
Pathiannia hun hman hi tun hnai hun eng emaw chen atanga electoral roll ennawna vote nei maktaduai 130 vel paih duh lohna an lantir zuina kal zel a ni.
Eptute hian CEC Gyanesh Kumar-a leh Prime Minister Narendra Modi-a kaihhruai BJP chu vote nei theite ennawn hmanga inthlana an chak theihna tur thil tiah an puh a. BJP leh Election Commission of India (ECI) chuan an pha ve ve thung.
Pung khawmte hian ‘Vote hum la, ram chhan rawh’ tih te, ‘Vote ruk, thuneihna kalsan rawh’ tih ten an au a, ram hmangaihna hla sa leh lâm an awm bawk a. Pun khawmna chhehvelah hian police leh paramilitary mi sang tel duty an awm a, lirthei tlan dan tihdanglam a ni bawk.
Gen Z-te kaihhruai, Cockroach Janta Party (CJP) pawhin INDIA an thlawp thu an sawi a; mahse, politic-ah tan lam nei thei an nih loh avangin an hruaitute inlan an awm lo.
ECI-in a sawi dan chuan electoral roll ennawn, special intensive revision (SIR) hi thi tawh te, insawn te leh hmun khat aia tama vote nei te, vote nei thei lo turte paiha siam remna tur niin an sawi a. Eptute erawh chuan vote nei thei chiang tam tak paih an ni a, rorel lai, BJP-in inthlana an hlawkpui theih tur ang zela thil kalpui niin an sawi ve thung.
ECI leh CEC laka lawm lohna hi September thlaa The Indian Express chanchinbuin Kumar-a’n a thawhpui, election commissioner pahnihte thu lo angin thutlukna vawi tam tak a siam nia an tar lan atangin a darh tan a ni.
ECI chuan member pathum zingah ngaihdan inang lo a awm fo va, an rorelna leh thutlukna siam erawh inlungruala tih vek a ni tho tiin a insawi fiah.
Kawng zawh leh pun khawm an huaihawt hma hian Gandhi-a chuan eptuten hian ‘Indian mipui rorelna thiah’ mek an do dawn a, mi maktaduai tel rorelnaah an tel ve thei tawh lo niin a sawi.
Inrinni khan INDIA hruaitute hian Delhi-a Congress President Mallikarjun Kharge-a chenna inah Kumar-a impeachment an lo huaihawt tawh bawk.
Lok Sabha speaker hlui, Meira Kumar-i kaihhruaia parliament session ang deuhva hun hmanah hian hruaitute chuan CEC chu ‘inthlan ruk bona tura thil phiar’ angin an sawi a, electoral roll-a hming chuang maktaduai 130 paih angin an sawi a ni.
An thil tih hi entirna mai a ni a. Indian danah CEC hi bân tur hian parliament-a rel ngai a ni.
Modi-a chuan Kumar-a laka impeachment lem tih chu sawi chhuak chiah lovin Zirtawpni leh Inrinnia vantlang hmaa hun a hmannaah eptu party-te chu ram danpui zahawmna tichhiaa dah hniam tumah a puh.
INDIA-in hun an hman hi Delhi Police chuan khuahkhirhna tam tak siam chungin phalna an pe a. Chanchinbute chuan tlai dar 5:00 thleng chauh hun hman phalsak an ni a, CCTV camera bun a ni a, kawng zawh pawh ruahman lawk chin bak pelh an phal lo niin an tar lang.