Aizawl: Mizoram sorkar chuan hmasawnna hna leh kalpui tul dangte thawhna turin October, 2026 chhung khan chhiah hrang hrang atangin Rs 1,60,33,70,744 a hmu a, he sum hmuh chhuah belhkhawm hi September thlaa chhiah atanga sum lut nena khaikhinin Rs 82,51,39,750-in a tam zawk a, tun sorkar kum kal meka thla khata hmuh tam ber dawt a ni.
Taxation department chhinchhiah danin, October thla chhung hian Goods & Services Tax (GST) atangin Rs 84,77,61,069 lai hmuh chhuah a ni a, hetiang bawk hian Sales Tax atangin Rs 54,42,95,275 lai hmu bawkin, Profession Tax atangin Rs 1,85,50,766 leh Road Maintenance Cess leh Social Infrastructure & Services Cess atangte pawhin Rs 9,63,73,832 ve ve hmuh a ni bawk.
Hei hi sorkar kum kal meka April thla hnu lama sum hmuh tam ber tum a ni a; April thla khan Rs 2,09,30,61,057 hmuh niin, September thla kha a dawng tlem ber tum a ni thung. He mi tum hian Rs 77,82,30,994 hmuh a ni.
Tun sorkar kum kal mek thla sarih chhung ringawta chhiah atanga sorkar sum hmuh tawh zawng zawng chu Rs 8,61,46,55,745 a tling tawh a ni.