Chief Minister’s Conference Hall, Aizawlah Chief Minister Lalduhoma kaihhruainain Aizawl khawpui traffic tawt tihziaawmna tur, Externally Aided Project hnuaia ‘Aizawl Sustainable Urban Transport Project’ (ASUTP) kalpui dan tur sawi hovin Thawhtanni khan an thukhawm.
Thutkhawm kaihruaitu, chief minister chuan khawpui traffic tawt tihziaawm nan leh mipui hriselna tihhmasawn nan public transport rintlak leh thianghlim, hunbi vawng thlap a tlan neih a pawimawh thu sawiin, UD&PA department hmalakna hnuaia kea kalna tur, junction thawm thatna leh motor dinna tur ruahmanna ASUTP hnuaia siam a ni chu lawmawm a tih thu a sawi a, khawpui chhung piah lamah pawh mihring chengin a zim tawt hmaa kawngpui pawimawhte ruahmanna siam lawk a pawimawh thu a sawi bawk.
Thutkhawmah hian UD&PA Director Jacob Lalawmpuia chuan PowerPoint presentation pein ASUTP hi Asian Development Bank (ADB) kaltlanga FY 2027-28 leh 2030-31 chhunga Phase I kalpui tur niin, Rs vaibelchhe 414.04 hmangin public transport thawmthat, depot terminal, EV charging station sak leh junction pathum (Kulikawn–Bawngkawn, Temple Square–Vaivakawn, Bawngkawn–Ramhlun) thawmthat te a huam dawn thu a sawi a; Sihhmui, Muallungthu leh Bungbangla-a regional terminal sak turah thlai thar dah thatna siam belh dan tur leh Aizawl Western Bypass road nena traffic thlun zawm dan tur te sawi ho a ni bawk.
He hunah UD&PA Minister K.Sapdanga, Adviser to Chief Minister (Finance & Planning) TBC Lalvenchhunga, UD&PA Secretary V. Lalsangliana, Planning & Programme Implementation Department Secretary David Lalthantluanga, Finance Department Secretary Ramchuana, Deputy Commissioner Er. Lalhriatpuia, Transport Department Director Er. R.Lalrammawia, Aizawl Traffic SP C.Vanlalvena, PWD, P&E, Central YMA, Aizawl City Bus Owners’ Association, Mizoram Taxi Association leh Mizoram Maxi Cab Owners’ Association hruaitute an tel a ni.