Aizawl: Aizawl chhehvela hmun ruat lova leivung, bawlhhlawh leh in sakna/thiahna hmuna paih thin a nih avangin kawngpui leh lui tui a bawlhhlawhin, nungcha leh thing leh mauten chhiatna nasa tak an tawk mek a, Aizawl Municipal Corporation (AMC) chuan hetianga phalna hmun lova bawlhhlawh leh leivung paih chingte chungah dan angin hma an la tawh dawn.
Mual leh hmun hrang hrang AMC-in hmun a ruatsak bakah mi mal ram pawh ni se, AMC phalna lova leivung leh bawlhhlawh paih a thiang lo tiin hriattirna chhuah a ni.
Dan kalha hetiang thil ti a phalna hmun lova bawlhhlawh paihte chungah hian Section 153, 157, 157-A (1), (2), (3) & (4) leh 164 (1), (2) & (3) of the Mizoram Municipalities Act, 2007 bakah Section 4.2 of the AMC Solid Waste Management Bye-Laws, 2019 hmangin an chungah hmalak a ni dawn tih an tar lang bawk.