Aizawl: Rural Development & Administration Department Minister Prof. Lalnilawma chuan Nilaini khan Bukpui khuaah Rs nuai 270 senna tur ‘Lal Khawkunga Hall’ lungphum a phum a, he hunah hian Assembly Speaker Lalbiakzama (Lal Khawkunga tupa) chu Special Guest niin, Tuirial bialtu MLA K. Laldawngliana chu khualzahawm a ni.
Khuallian Minister Prof. Lalnilawma chuan thu sawiin, hall sak a nih theih nana hma latu RD department leh khawtlang hruaitute chungah lawmthu a sawi a, khawtlang intodelh a pawimawh thu sawiin, Mizoram Village Council Act, 2025 hnuaiah Village Council-ten anmahni puala sum lakluhna (own source of revenue) an neih a, neitu thinlung pua sorkar ruhrelte a chhia thawmthaa an enkawl zui zel a tul thu a sawi.
Special Guest Lalbiakzama pawhin a pu Lal Khawkunga chu Mizo lalte zinga Pathian thu awih hmasa leh Kristian Hla Bu No. 343-na phuahtu a nih thu sawiin, hall sak theihna tura theih tawp chhuahtute chungah lawmthu a sawi.
Bialtu MLA K. Laldawngliana pawhin eptu bial ti miah lova sorkarin hall tha tak a ruahmansak avangin lawmthu a sawi bawk.
He hall thar hi SASCI Part-IX (2025-26) hnuaia sanction niin, Tribal Youth Construction, Falkland ten an thawk dawn a, a hnuai berah garage leh tuizem awmin, a chung lamah Badminton Court leh stage changkang tak siam tura ruahman a ni.