Aizawl: Central YMA Hall, Tuikhuahtlangah Central Co-Ordination Committee (CCC) vawi 107-na inkhawm chu Nilaini khan neih a ni a, he hunah hian YMA Rorel inkhawm vawi 5-na thurel hrang hrang bawhzui dan tur sawi hovin a tam zawk chu Central Executive Committee (CEC) te a tul anga hma la tura tih a ni.
Central YMA President R. Lalngheta kaihhruai he committee-ah hian palai 198 an kal a, H. Lalhmangaihzuala, Vice President, Manipur Group YMA-in hunserh hmangin, S.F David Ngursangzuala, Asst. Secretary chuan hmalakna tlangpui a tar lang a, Prof. Malsawmliana, General Secretary leh Vanlalruata ten Lammual ram chungchanga mi mal ram nei te chungchanga Central YMA hmalakna a sawi fiah bawk.
CCC thurel zingah hian Mizorama hna rawn thawk company-ten tual chhung mi tam zawk an chhawr theih nan leh, aia upate zah inzirtirna, environment humhalh, Mizo Lengkhawm hla leh YMA hlate uar zawka sak a nih theih nana CEC-in a tul angin hma la se an ti.
Sorkar khawih thurel hrang hrang – Bairabi leh Sairang inkar Rel Station-ahtea uluk zawka Inner Line Permit (ILP) check, Mizo leilung fate himna tura Trading Regulation felfai tak siam leh raltlante leh ramdangmi dan lova sumdawngte khuahkhirhna mumal zawk siam chungchangah te sorkar a tul anga dawr tura CEC te kutah dah a ni a; YMA dan bu hman lai pawh kum 2027 YMA Inkhawmpuia chhawp chhuah a nih theih nan CEC-in ruahmanna siam se an ti bawk.