Aizawl: Kuthnathawktu khawsak harsate chawikanna tura duan Chief Minister Rubber Mission hnuaiah Chief Minister Lalduhoma leh Land Resources, Soil and Water Conservation Minister Lalthansanga ten Chuhvel khuaah Rubber huan an nei ve nia sawi awm chu pawi a tih thu leh hetianga mi lianten a hlawkna an tel ve zel chuan Mission tum a hlawhchham dawn tih MPCC Vigilance Department Chairman R. Vanlalvena chuan a sawi.
Ningani khan Aizawl Press Club-ah thu thar thehdarhtute kawmin R. Vanlalvena chuan, NABARD RIDF Loan Rs vaibelchhe 27.982 senga kalpui, December 16, 2024-a Chief Minister-in a hawn tak Chief Minister Rubber Mission hi Mamit leh Kolasib district-a cluster 24, hectare 1,000-a kalpui mek a ni a, Mission kaihhruaina danah chuan kuthnathawktu khawsak harsa leh tlangram lo neia eizawngte chauh thlan tur an ni. Mahse, Chuhvel khaw mipuite sawi danin, Chief Minister leh Soil Minister (Mission Governing Board Chairman leh Vice Chairman ni bawk) te hian he project atang hian rubber huan siam vein, rubber tiak, lei tha leh hmun vah/samna pawisa bakah hmun hungna tur mau leina hectare khatah Rs. 6,300 zel an dawng ve niin a sawi.
RTI chhanna atanga a lan danin, Chuhvel project hmasaa thlan mi 74-te hnena rubber hmun hungna tur pek tawh sa Rs nuai 63 chu lak let sak leh a nih bakah, Chief Minister leh Minister te huan panna kawng laih nan Rs nuai 18.90 hman a ni tih R. Vanlalvena chuan a sawi.
Hei bakah, Kanghmuna Rubber Demonstration Plantation enkawl nana hman nia tarlan Rs. 2,61,860 chu a taka hmuh tur a awm lo nia khaw neituten an sawi thu leh, Bilkhawthlir North Rubber Cluster panna lei siamthatna Rs. 37,450 bakah official zinna senso Rs. 3,20,000 te pawh Chief Minister leh Minister thlam sakna atana hman then ni zawka an ngaih thu sawiin, W. Phaileng leh Kawrtethawveng lama rubber huan siam belh an tum nia sawi pawh ti tawh lo turin Congress chuan a ngen tih a sawi bawk.