Mipuiin ration buhfai buk dik leh tling an dawn theih nan ration dawra hman lai ePoS khawl leh buhfai bukna, digital weighing scale (DWS) thlunzawm vek a nih tur thu leh buhfai phur motor zawng zawngah GPS tracking device (AIS 140) vuah vek a ngaih tawh tur thu Food, Civil Supplies & Consumer Affairs (FCS&CA) Minister B. Lalchhanzova chuan Ningani chawhma khan a pisaa thu thar thehdarhtute a kawmnaah a sawi.
Minister chuan sorkar laipui ruahmanna angin FCS&CA department chuan hma la nghalin, retailer-te hnenah training pek mek a ni a, November, 2026 ration buhfai sem tan hmaa pek zawh hman vek tum a nih thu sawiin, “Heng khawl pahnihte hi hun rei tak hman tawh ni mah se, thlunzawm a la nih loh avangin buhfai buk tling lova inpek palh a awm thei a, tunah chuan thlunzawm a nih tawh dawn avangin buk dik lo a awm thei tawh dawn lo a, buhfai latu tur dik takin a la ngei em tih pawh a finfiah theih tawh dawn a ni,” a ti.
Internet connection that lohna hmun leh khawl chhia siam laite chu ngaihhnathiam an nih dawn thu sawiin, internet harsatna avangin retailer 263-te chuan he khawl thlunzawm kalphung hi an la zawm ve nghal thei dawn lo tih a sawi.
Buhfai phurh kual vil hna pawh khawl tha zawk hmangin kalpui a ni dawn tih sawiin B Lalchhanzova chuan, go-down leh go-down inkar bakah go-down leh retailer inkara buhfai phurh kualte chu software chi thum — Supply Chain Management System (SCMS), Route Optimization Tool (ROT) leh Vehicle Location Tracking System (VLTS) hmangin control room (command centre) atangin uluk taka vil a ni dawn a, hetiang vilna atan hian command centre pawh peih fel a ni tawh tih a sawi a. “Buhfai phur motor-te chuan GPS tracking device (AIS 140) an vuah ngei a ngai dawn a, vuah duh lote chuan buhfai an phur thei tawh dawn lo a ni,” a ti.
Sorkar chuan retailer-te harsatna hriatthiampuiin buhfai semna atanga an hlep leh buhfai phurhna man a tihsan sak tih sawiin Supply Minister chuan, retailer-te buhfai phurhna man chu quintal khatah Rs. 75-ah tihsan a nih bakah, an hlep chu AAY leh PHH-ah kg khatah Rs. 3.00-ah tihsan a ni a, PHH (Additional), Non-NFSA leh MSSRP-ah te kg khatah Rs. 2.00-ah tihsan a nih thu a sawi a. Retailer-ten dik taka hna an thawh a, buaina awm lova hlep tha zawk an neih chu sorkar duhthusam a nih thu a sawi bawk.
FCS&CA department chhinchhiah danin, Mizoramah hian Fair Price Shop 1,266 a awm mek a, ration card nei chhungkua 2,96,051 awmin chu chuan mihring 11,78,801 a huam a, thla khata Mizoramin ration buhfai a mamawh zat chu quintal 91,000 a ni.