Aizawl: Mizoram State Legal Services Authority (MSLSA) leh Mizoram University (MZU) Department of Sociology tangkawp buatsaihin, Ningani khan MZU School of Education Seminar Hall-ah ‘The Mizo Marriage and Inheritance of Property Act, 2014’ chungchanga workshop neih a ni a, Gauhati High Court Judge leh MSLSA Executive Chairman ni bawk Hon’ble Justice Nelson Sailo chuan khuallian niin a hmanpui.
Workshop hawnna inkhawm, Sociology Department Assistant Professor Dr. B. Lalzarliana kaihhruai leh HoD i/c Dr. R. Lalhruailiana’n inlawmna thu a sawinaah khuallian Justice Nelson Sailo chuan, he dan pawimawh tak hi university level thlenga thuk zawka zirchiana sawiho a tul tih sawiin, hetiang workshop buatsaih hian dan hriatna tihpun kawngah nasa takin a pui dawn tih a sawi.
Chawhma dar 11 atanga tan Technical Session hmasa berah resource person R. Lallianzuala leh Prof. Irene Lalruatkimi ten Mizo inneih dan phung lo pian chhuah dan, hnam dan, hmeichhe chanvo leh rokhawm chungchang bakah kum 2026 Amendment-in nghawng a neih dante an sawi a, Prof. Irene Lalruatkimi chuan hmeichhe chanvo humhalh leh hnam dan siamthat kawnga MHIP mawhphurhna pawimawhzia a tar lang bawk.
Chawhnu dar 2-a tan Technical Session pahnihnaah resource person Advocate Saihmingliana Sailo leh Government Mizoram Law College Principal hlui Prof. Rualkhuma Colney ten dan lo pian chhuah dan, inneihna register dan, inthenna leh ro insem dante sawifiahin, tunlai khawtlang nunah hnam dan leh dan thar kalhmang inzawm dante an sawi. Session tinah hian sawihona leh zawhna chhanna hun hman a ni.