- Rinfela Zadeng
Khawngaihna pianpui miah lo mihring hi kan awm lo ang a; Pathian atanga chhuak a nih avangin mi pangngai chuan khawngaihna hi kan pianpui vek awm e.
- Hmangaihna leh khawngaihna
Hmangaihna leh khawngaihna hi unau an ni e han ti ila kan sawisual awm lo e. An hnathawh leh an thil tum, an thil tih dan te pawh in inanna chen tam tak a awm a. Chutih rual chuan hmangaihna chuan phut let a nei a, khawngaihna chuan phut let a nei ve lo hi an danglamna lian tak a ni awm e. Khawngaihna dawngtu chuan a phu vang a ni lo a, pek let ve tur engmah pawh nei lo mahse a khawngaihtu chuan a thlawn liau liauin a khawngaih tawp mai a ni.
- Pathian khawngaihna awmzia
Pathian khawngaihna (sola gracia) hi a chunga kan sawi tak ang chiah hi a ni a. Suala tlu mihringte hian kan phu vang leh kan that vang emaw kan thil tih ve emaw vang ni loin Pathian chuan min khawngaih tawp mai a. Chu a khawngaihna chuan chhandamna a kengtel a, Isua Krista chu Pathian khawngaihna mihringin a tak ngeia kan hmuh leh chan a lo ni a. Isua Krista rin chu khawngaihna avanga chhandam kan lo nihna bul a nita a nih hi (Ephesi 2:8 -10).
- Khawngaihna changtu nun
Miin Pathian khawngaihna chu a hriatchiana Isua Krista rinna kaltlanga A khawngaihna a lo chana a lo dawnsawn tawh chuan a nun zawng zawng chu Pathian tan a hlan let thin. Chutak chu ringtu nun, Lal Isua hnungzuitu nun kan tih chu a lo nita a ni. Mi – suala a tluk leh chhan te, piangthar tawh da leh – kan tih fo tawngkam leh nun kan neih chhan hi Pathian khawngaihna tak tak kan hriatchian loh vang leh a awmzia tak tak kan hriat loh vang a ni. Zawhna min zawt lo a, kan nun hlui sual te leh kan tlin lohna zawng zawng te leh kan nihna ang ang kha Pathian khawngaihna chuan min pawmin Isua Krista kaltlangin min chhandam tawp mai a nih hi. Chu mi nun neitu chuan suala awm reng leh sual ti tura nung a nih lohzia inhriain Lal Isua hnung zuiin a nun pumpui chu a lo hmang zo ta thak zel a ni. Chu chu Tirhkoh Paula te nunah pawh kan hmuh hi a lo nita a ni.
- Khawngaihna thiltum
Pathian khawngaihnain a tum lian ber leh A khawngaihna chhan chu mihringte chatuana nunna kan neihna tura chhandamna hna thawh hi a ni. Ni tin kan nunah te, thlemna sual kan tawh lai mek pawhin Pathian khawngaihna chiang taka hretu chuan a khawngaihtu Pathian duh zawng leh a thiltumte chu tihhlawhtlin ngei tum a nunpui a. Chak lo tak leh tling chung chungin Lal Isua hniak hnung a zui a, a nun chu Pathian khawngaihnaa innghatin chatuna nunna chu a ta a ni zia hriain a dam lai nun chu a hmang zo ta thin a ni.
Keini pawhin Pathian min khawngaihna avanga chhandama kan awmna chhan hi hrechiang thar ila. Khawngaihna avanga rinnaa chhandam kan nihna nun, kan nihna thar leh kan nihna dik tak zawk chu nunpuiin kan damlai nun hi chhiar zo ila. Tichuan Pathian khawngaihna leh Pathianin thiltum chu a nihna ang tak leh a nih dan tur ang takin kan changin kan nei ang a. Chu Pathian khawngaihna hlu tak chuan chatuana nunna min thlen dawn a ni.