Aizawl: UD&PA Minister K. Sapdanga chuan Ningani khan Vana Pa Hall, Aizawl-ah sorkar laipui scheme PM-SVANidhi chhawr tangkaitu kawngsira thlai leh bungraw hrang hrang zuara eizawngte puala ‘SVANidhi Mahotsav 2026’ chu khuallian niin a hmanpui a, he ni puala chawimawina dawngtute thilpek a hlan nghal bawk.
Khuallian K. Sapdanga chuan India ram puma SVANidhi Mahotsav hmanna tur khawpui 76 thlan chhuahte zinga Aizawl a tel ve chu lawmawm a tih thu sawiin, he kutpui hlawhtlinna bul ber chu loan laa rinawm leh taima taka eizawngtu beneficiary-te an nih thu a sawi.
UD&PA department chuan mi harsa zawkte dinchhuahna atan theihtawp a chhuah zel dawn tih sawiin, minister chuan kalkhawmte chu hausakna tak tak chu an thlamuanpui theih chinah a innghat tih hre reng tur leh, eng eizawnna pawh rinawm taka thawh chuan a zahawm a ni tih thangtharte zirtirtu ni zel turin a chah a, tanrualna tha tak neitu department hotute leh bank-te hmalakna a fak bawk.
PM-SVANidhi Mission Director Jacob Lalawmpuia tar lan danin, June 1, 2020-a tlangzarh PM-SVANidhi scheme hnuaiah hian Mizoramah July 2020 atangin loan pek chhuah tan a ni a, nimin thlengin mi 4,878 chuangin an chhawr tangkai tawh a ni.
COVID-19 hripui leng avanga street vendor-te harsatna chhawk zangkhai nana Rs. 10,000 loan atanga bul tan ni mah se, a tangkai em avangin ennawn hnuah August 2025 atang khan SVANidhi 2.0 chu kum 2030 thleng kalpui tura ruahman thar leh a ni a, loan pek mai bakah beneficiary-te leh an chhungte chu sorkar social security scheme hrang hranga telh vek tura hmalak mek a ni.