Mizoram Public Service Commission (MPSC) hna lak kalpui danah thil fel lo leh tihsual a tam lutuk avangin Mizo Students’ Union (MSU) chuan November 19 ral hma ngeia MPSC chairman chu a nihna bânsan turin an phut.
Inrinnia MSU General Headquarters hruaitute emergency meeting an pisaa neih chuan, kum hnih chhung ringawta MPSC-in tihsual siam thatna (corrigendum) vawi 20 chuang a tichhuak chu thalai hna zawng mekteah rintawk lohna thlentu lian takah an ngai a; chuvangin Chairman chuan mawhphurhna laa Pathianni atanga chhiara ni nga chhung ngeia a bâng lo a nih chuan ram pum huapa zirlaite nen nasa zawka hmalak zui an tum thu an sawi.
Hemi rual hian Food, Civil Supply & Consumer Affairs Department hnuaia storekeeper 15 laknaa mark pek dan tihsual chu ni 10 chhunga siam tha tur leh, MPSC kalphung chhui chiang turin thla khat chhung ngeia high level inquiry commission din turin sorkarah rawtna thlen an rel bawk.
Hna lak a chak zawka a kal theih nan group B gazetted chung lam leh non-gazetted hnuai lam chu Controller of Examination hran ve ve-a enkawltir ni se an ti a; hna zawng mekten MPSC website/portal version 2.0-ah leh technical line-a document upload-naah harsatna an tawh thinte sutkian a nih theih nan thuam that leh ni se tiin hmalak an rel bawk.