ZPM thalai president-in Kuhva Kût buatsaih lawmawm ti

Aizawl: Tunlaia mipui eizawnna leh khawtlang nuna nghawng tha tak neitu chawisan nana ‘Kuhva Kut’ buatsaih a ni chu thil chhinchhiah tlak leh lawmawm tak a nih thu ZPM Thalai president leh South Tuipui bialtu MLA Jeje Lalpekhlua chuan Inrinni khan Aizawl Press Club-a thuthar lakhawmtute a kawmnaah a sawi.

Jeje Lalpekhlua chuan pi leh pute atanga kut an chhawmte humhalh tlat rualin, mi thenkhatin kût phuahchawp tia sawi hniam tum mah se, eizawnna atana thil pawimawh chawisan nana kut thar neih chu lawmawm an tih thu a sawiin, “Kan eizawnna leh kan dam khawchhuah theih nana a tha zawnga nghawng nei liante chawisan nana kût thar kan nei chho ta hi keini chuan a lawmawm kan ti zawk a, thil chhinchhiah tlakah kan ngai a ni,” a ti.

Ni hnih awha Kawrthaha Kuhva Kût vawi 2-na neih zawh takah khan sorkarin kuhva tawlh ruk a khap hnuah Mizoram mipuite thar chhuah leh hralhna sum hmuh zat a sang ta hle tih a lang a, ZPM |halai General Headquarters chu a lawm hle tih a sawi bawk.

Hemi rual hian, sorkarin ruihhlo do kawngah hma a lak chak thu sawiin, kumin January atanga November ni 6 chhung khan Mizoram Police-ten ruihhlo leh a kaihhnawihah thubuai 347 ziak lutin mi 515 an man tawh a, chung ruihhlo mante chu Rs vaibelchhe 679.35 chuang man hu a tling tih a sawi.

Ruihhlo man zingah hian methamphetamine (kg 607.05) leh heroin (kg 45.688) te chu a tam ber niin, crystal meth, ganja, opium leh morphine te pawh thahnem tak man a nih bakah, November ni 8 leh ni 9 khan Keifang leh Zokhawtharah Rs nuai 437 chuang man hu heroin leh methamphetamine man belh leh a ni tih a sawi bawk a ni.

Leave a Reply

error: Content is protected !!