Chhiartu leh thlirtu hip tum luat avanga thu belhchian dawl lo leh dik tawk lo thehdarh hian a chhe zawngin mi mal nun a nghawng theih avangin, ram khalh ngilna tura thu dik leh rintlak chauh buatsaih turin Chief Minister Lalduhoma chuan chanchinbu mite a chah a, Mizoram chu India-a 1st Digital State nih tumin a inbuatsaih mek tih a sawi bawk.
Thawhtannia I&PR Auditorium, Aizawla ‘Journalism: Populist or Responsible?’ tih thupui hmanga National Press Day 2026 hmannaah khuallian niin chief minister chuan mipui rorelna ramah thuthar thehdarhtute chu rorelna lungthu palina (fourth estate) leh ram siamthatna hmanraw pawimawh tak an nih thu a sawi a. Digital media hmang tangkai tura inherrem zel a tul thu sawiin, cheque hman ngai tawh lova indawrtawnna kalpui thei tura ruahmanna siam mek a nih thu a sawi.
Thlei bik leh duhsak bik nei lova thu dik din chhuahpui tur te, mi mal nun zahawmna vawnsak leh thu lakna sahimna ngaihtuahsak chungin ram leh mipui tana rawngbawltu an ni tih hre renga thawk turin chanchinbu mite a fuih a ni.
Khual zahawm IPRP&S Department Minister B. Lalchhanzova pawhin mi nawlpui tui zawng ringawt ngaihtuah lo va, mipuiin thutlukna dik an siam theih nana thu dik leh pawimawh lakkhawm ngai pawimawh zawk turin journalist-te a chah a. Sorkar hnuaia hamthatna hrang hrang — ex-gratia, Assistance to Accident & Critical Illness leh sorkar advertisement rate-te ennawn leh siam that a nih thu a sawi bawk.
IPRP&S Secretary Betsy Zothanpari Sailo chuan print media bakah electronic media huam tel tur advertisement policy puitling duan mek a nih thu a sawi.
MJA President Vanlalrema Vantawl chuan sorkar hotute zingah press mite hnaih tam leh hnaih ngam apiang hi langtlang, huai leh dik taka hnathawkte an nih thin tlangpui thu a sawi a. Chutiang mi thahnem tak Mizoram sorkar hnuaiah hruaitu leh hnathawk an awm thin chu lawmawm a tih thu a sawi. Thuthar lakkhawm leh thehdarh hna rintlak taka kalpui a nih theih nan MJA member zinga chanchinbu tichhuak mumal tawh lote chu chawlhtir bakah sorkar atangin advertisement pawh pe tawh lo turin rawtna theh luh a nih tawh thu a sawi bawk.
I&PR Director Mina Zoliani Joute-in inlawmna thu a sawi a, he hunah hian Documentary Emmy Awards dawngtu, HC Vanlalruata leh Kalyan Barooah Memorial Media Recognition dawngtu, Dr. Lalnunkimi Colney-te hnenah chawimawina hlan an ni a, I&PR director leh MIS officer kal chhuak tawhte bakah media pawl hrang hrang aiawhte hnenah thilpek hlan niin, kum 2025–2026 chhunga journalist boralte sunna leh hriatrengna hun hman a ni bawk.