Aizawl: Aizawla Assam Rifles (AR) chhuahsan ram tur chu mi mal kuta a luh loh nan a theihtawpa hma a lak thu sawiin, Major Babie Lalduhsangi (Retd) chuan political party pakhat emaw, sorkar emaw tihmualpho tumna a neih loh thu leh party inbeihnaah hnuk lut tawh lo turin political party-te a ngen.
November 12, 2026-a MNF Treasurer Lalruatkima’n thu thar thehdarh tute a kawmnaa zawhna a siam chhang letin lehkha a thawn a, a lehkha thawnah TV interview-a a thusawite uluk taka ennawn chuan political party fakna emaw, sawiselna emaw a awm lohzia a lang chiang tih a tar lang.
Sorkar hmasain AR chhuah theih nana Zokhawsanga hna tam zawk an lo thawh tawh chu zahawm a tih thu leh tuna sorkar kal laiin chak taka hma a la mek chu lawmawm a tih thu a tar lang bawk.
Lammuala ram pass 60 leh LSC-te chu state sorkar issue vek emaw, MNF-in an insem vek emaw a ti lo tih sawiin, AR-a OIC Estate (MHA tana Mizoram chhunga AR ram enkawltu) a nih laiin Memorandum of Understanding (MoU) leh Draft MoA behchhanin AR HQ, Shillong-ah presentation a lo pe tawh tih a tar lang a. Kum 2020-a AR ram chhuahsan tur hmun lia pass nei mi 109 leh Zokhawsanga pass nei mi pakuate pass cancel vek a nih hma chu insawn a him loh thu October 16, 2020-ah HQ DGAR-ah lehkha a lo thawn tawh tih a tar lang.
AR Ground pawh kum 1960 chho atangin pawla insiamin LSC pali-ah an lo inthen tawh a, kum 2020-a pass nei record mi 60 zinga pass pasarih chu Mizoram sorkar list nen a inan loh avangin AR lama kal tawh lo tura hriattir an nih thu a sawi a. Chung zinga mi pali chuan AR Ground hi 1920 bawr (British Era) atanga an pu (grand-father)-ten pass an neih thu leh court-ah pawh an chak ngei tur thu an sawi tih sawiin, heng pass-te hi LSC No. 708/76 dt 1969, LSC No. 339 dt 1973, LSC No. 200 of 1973, HP No. 588 dt 1973, LSC No. 896 dt 1974, HP No. 1989 dt 1975 leh HP No. 1988 dt 1975 te an ni a, heng pass neitute hi revenue dept-ah an in-report em tih erawh an hriatpui tawh loh thu a tar lang.
AR ram buai leh compensation case kal lai 34 a awm thu leh ram acre 51-a zauah pass nei an pun nasat avangin March 25, 2019 khan central-a chhui chian a lo dil tawh thu a tar lang bawk.
Chief minister hlui leh tuna ni mekte fakna emaw, demna emaw a sawi loh thu leh a rilru that avanga a chunga khing mite chet duh dan a hrethiam lo mai tih a sawi chhan zawk a nih thu Major Babie Lalduhsangi chuan a sawi a, Mizoram mipuite tana hmun tha an neih chhun humhalh chu ram leh hnam hmangaihtu dik tak rilru a nih avangin eng party pawh sorkar se a tih ngai tho a tih leh tho tur thu a tar lang a ni.