Council of Ministers-in sorkar hnathawk nghet DA 50% leh nghet lo 20%-a tihsanna tur pawm

Chief Minister Lalduhoma kaihhruai Council of Ministers chu Thawhlehni khan Cabinet Room-ah thukhawmin December 1, 2026 atanga hman tan turin sorkar hnathawk nghette Dearness Allowance (DA) chu zaa 46 atanga zaa 50-ah leh contract hnathawkte DA chu zaa 10 atanga zaa 20-a tihsan an pawm a, kum 10 chuang thawk tawh contract hnathawkte leh kum 14 chuang thawk tawh provisional hnathawkte ngheta dah an remti bawk.

Thutkhawmah hian hnathawh leh hmasawnna lam kaihhnawih thil pawimawh an rel a. Fisheries department hnuaia District Fisheries Development Officer (DFDO) hlawh chu Pay Level 10A atanga Level 11-a hlan kai te, Directorate of Commerce & Industries hnuaia hna awm dan her rem (restructuring) te leh Mizoram sorkar hnuaia provisional hnathawk lak dan kaihhruaina thar, ‘The Government of Mizoram (Amendment), 2026’ duan lawkte chu an pawm a ni.

Mizoram Police Manual, 2005-a Para 899 siam thain, police officer-ten attendant an neih theih zat tihhniam rawtna pawh an remti bawk.

Heng bakah hian sorkar sum leh pai leh ei leh bar lam kaihhnawihah MIFCO Ltd. mi mal kuta hlan tura thu lo tihtluk tawh sut leh te, tual chhung buhfai lei khawlna tur, ‘The Mizoram Local Rice Procurement Policy, 2026’ duan lawkte leh zirna in provincialise tura inkaihhruaina tharte chu Council of Ministers hian a pawmpui a. Sorkar tirha MBBS zir chhuakten bond an ziah anga hna an thawh chhunzawmna tur ruahmanna pawh an pawm fel bawk.

Leave a Reply

error: Content is protected !!