Cong treasurer-in ECI hna thawh dan, SIR kalpui fel lo leh vote chori nia sawite sawi fiah

Aizawl: Mizoram Pradesh Congress Committee (MPCC) Treasurer Dr. Lalmalsawma Nghaka chuan Thawhlehni khan Aizawl Press Club-ah thuthar thehdarhtute kawmin Election Commission of India (ECI) hnathawh dan leh electoral roll ennawn hna (Special Intensive Revision – SIR) kalpui danah thil fel lo leh ‘Vote Chori’ (vote inruksakna) nia Congress party-in a ngaih chungchang a sawi fiah.

Dr. Lalmalsawma Nghaka chuan mipuiin danpuiin vote thlak theihna a pek chu an hmang dik em tih leh inthlanna kalpuitu institution chu a zalen em tih chu India rama zawhna pawimawh ber a nih thu sawiin, Rahul Gandhi leh Congress hruaitut’n Maharashtra-a voter nuai 39 pung thut te, Bengaluru Mahadevapura biala vote nuai khat chuang dik lo hmuhchhuah te leh Haryana chungchangah te rinhlelhawm tam tak an lo phochhuah tawh thu a sawi.

September 2026-a The Indian Express zirchiannaah election commissioner pahnih, Sukhbir Singh Sandhu leh Vivek Joshi te’n thla 10 chhungin vawi 14 lai Chief Election Commissioner (CEC) Gyanesh Kumar thutlukna an dodal tih a lan thu sawiin, SIR kaltlangin state leh UT 30-a draft roll atangin hming vaibelchhe 13 chuang paih a nih thu leh West Bengal bikah Supreme Court a inrawlh thu a sawi a. ECI erawh chuan commission chhungah inngeih lohna a awm lo tiin insawi fiah mah se, Congress chuan record dik tak leh dodalnate tlangzarh a phut tih a sawi.

Kum 2023-a parliament-in CEC ruat dan thar a siam chu Congress chuan a duh lo hle tih MPCC Treasurer chuan sawi bawkin, Chief Justice of India aiah Prime Minister ruat Cabinet Minister dah a nih tak avangin sorkar thuneihna a sang lutuk niin a sawi a. He dan thar Section 16 hnuaia Commissioner-te civil leh criminal thubuai laka humhimna pek an nih chu official duty chungchang bik atana duan ni mah se, mawhphurhna tihhniamna anga Congress-in a ngaih thu a sawi bawk a ni.

Leave a Reply

error: Content is protected !!