Aizawl: Lunglei Municipal Council (LMC) Vice Chairman ni lai K. Lalrinawma’n bânna a thehluh pawm a nih hnua vice chairman thar atana ruat, Ward No. IX Councillor Zorinsanga Hmar leh Executive Councillor thar atana ruat, Ward No. VI Councillor R. Lalremsiama te chu Thawhlehni khan Lunglei Convention Centre-a BoC Hall-ah Lunglei Additional District Magistrate (ADM) Rochuangkimi Khenglawt chuan rinawmna thu tiamtirin a la lut.
LMC Chief Executive Officer (CEO) HD Lalpekmawia kaihhruai lak luh inkhawmah hian Mizoram Municipalities Act, 2007 Section 14(2) leh Mizoram Municipalities (Procedure & Conduct of Business) Rules, 2007 Rule 33 tlawh chhana ruatna lehkha chhiar chhuah a nih hnuah ADM-in thu a tiamtir.
Rochuangkimi Khenglawt chuan lak luh tharte lawmpuiin Mizorama municipal body ding hmasa pahnihna a nih angin khawpui dang leh nakkin zela LMC la enkawl chhunzawm turte pawhin an entawn tlaka hma lakna tha leh dik neih a pawimawh thu sawiin, Lunglei district hmasawn nan sorkar department, tlawmngai pawl leh mipuite nen pheikhai rual taka thawk ho zel turin a chah a ni.
LMC Chairman Lalzuithanga pawhin thu sawiin, Vice Chairman hlui K. Lalrinawma’n political party lamah mawhphurhna pawimawh dang a chelh a ngaih avangin Executive Council insiam rem a tul thu leh, Vice Chairman leh Executive Councillor thar turte hi councillor-te’n lungrual taka an thlan chhuah an nih thu a sawi. Lunglei khawpui leh a chhunga chengte hmasawnna turin theihtawp an chhuah zel dawn tih sawiin, official-te leh mipuiten tha taka thawhpui zel turin a sawm bawk.
K. Lalrinawma hian November 2, 2026 khan bânna a thehluh hnuah November 10-a Board of Councillors (BoC) thukhawm thutlukna angin Chairman Lalzuithanga hian November 16 khan hruaitu tharte hi a ruat a ni.