MPSC hi a kal fuh lo laklawh a ni, thuahfai an ngai

Tun hnaiah Mizoram Public Service Commission (MPSC) in boruak duhawm lo an nei zeuh zeuh reng mai a, tunah phei chuan an hotu lawkte bang turin zirlai pawl pahnihin an nawr mek bawk. Enfiah zui an ngai hle.

Mizoram a hna sang zawng zawng latu, dik leh fair tura ngaih, an hnalak pawh felfai viau tura ngaih heti tak maia an mualpho chho ta mai hi a pawi a, siksawi leh thuahfai deuh chu an ngai tawh niin a lang. Kan zirlai pawl lian pahnih MZP leh MSU te chuan an Chairman, Secretary leh Controller of Examinations te chu bang tura an phutte an ni a, anni lam tanhmun atanga thlir pawh hian a awm viauin a lang.

Sorkar pawh hian a chhui zui mek niin a lang a, tuna an kal dan hi uluk takin thlir se la, a chhuitute pawhin huaisen taka chhuiin, an chhuichhuah dan dik tak, tuma mitmei veng lovin puang bawk se a duhawm hle.

Felfai leh thianghlim taka awm tura ngaih, thalai hna nei lote innghahna leh dik taka hna latu tur heti tak maia an mualpho chho ta hi ngawihbopui chi a ni lo a, sorkar hian a tihtur ti thuai thuai se, zirlai pawlte thu leh hla pawh hi bengkhawnin, a tul a nih chuan MPSC hi thuahfai mawlh teh se.

A ngai anga an kal leh a, engemaw boruak an nei leh a nih vaih chuan MPSC hian rin a hlawh lo lehzual ang a, thalai tam tak beidawng hian sorkar thlengin an tawng zui tawh mai ang tih a hlauhawm hle bawk.

Leave a Reply

error: Content is protected !!