Mizo hla zinga sak lar ber pawl, ‘Pari Zûn’ phuahtu Vanlalruata Zote (Ruata Zote), kum 69, Ramhlun North chu nimin chawhma dar 11:15 khan Nazareth Hospital, Chaltlang-ah cancer avangin a thi.
Ruata Zote hi Mizo hlaphuah thiam leh zaithiam hriathlawh tak a ni a, Mizo lengzem hla chuai thei lo ‘Pari Zûn’ a phuah chu Vanlalruati, Mimi Lalzamliani, Michael M. Sailo leh Lalenkawli Pautu te pawhin an lo sa chhawng tawh a. Amah ngei pawhin Ruata Zote Ft. NGO – ‘Pari Zun’ music video-ah a sa bawk.
‘Pari Zûn’ hi kum 1979 bawra a phuah a ni a, Pachhunga University College (Pachhunga College) a kal laia a phuah a ni.
Hetih laia a college kalpui, chhungkaw dinhmun inthlau tak, khawsak insan hleih tak chu a hmel duh tlat mai a, mahse, hmangaihna chuan dinhmun thliar hek lo le, hun rei vak lo chu hlim takin an awm ve a, mahse, dinhmun leh khawsak inthlauh na na na chuan chun leh zua avangin inthen a lo tul leh ta si a. Tichuan, he hla hi a lo piang ta nia sawi a ni.
“Ka phuah chhan ber pawh hian ka phuah chhan a ni tih a inhre lo va, a hrilh pawh ka hrilh chuang lo,” tiin Ruata Zote hian a lo sawi tawh a ni.
Ruata Zote hian ‘Pari Zûn’ bakah hian hla dang eng emaw zat a phuah bawk a, chung zingah chuan ‘Ti lo teh ang’ leh ‘Lei hringnun hi’ tih te pawh a tel a ni.
A ruang hi Ramhlun North Community Hall chhaka an chennaah nizan khan lumen niin, vawiin chhun dar 12-ah Presbyterian kohhran Primary Department Hall-ah vui a ni ang.