Russia chuan indona a chhuah hnua ni khata Ukrainian-ten drone hmanga an beih nasat ber tum a thlen thu leh Russia leh an luah ram, Crimea inkalpawhna lei pawimawh tak pawh chhe tenau a awm a, tuialhthei thlitfimna hmun tam tak a duh bawk tih an sawi.
Russian sipaite chuan darkar 24 chhungin drone 2,049 leh ral hla kap thei Flamingo missile pali lo dan leh kah thlak an nei niin thuneituten Thawhtanni zan khan an sawi a. An khawpui bik pan ringawt pawhin 600 chuang a thlawk niin Moscow Mayor Sergey Sobyanin-a’n a sawi.
Hetih lai hian Kyiv pawhin Thawhtanni khan air raid alert vawi 17 tiriin ni khata a tam ber tum a nih thu an sawi ve bawk a. Russian-te beihna avangin mi psarih vel an thi a, energy hmunhma chhiain mi 50,000 chuangin an power an neih loh phah.
Nasa taka inbeihna hi tun hnai lawkah US, Ukrainian leh Russian palaite indo tihtawp tuma an inbiak hnu lawka thleng a ni.
Ukraine-a indona hi Russia-in February, 2022 atanga thapui a beih atanga intan a ni.
Moscow-in Crimea-a hotu ber atana a dah, Sergei Aksyonov-a chuan drone-in Crimean Bridge a fuh ngei thu sawiin lirthei kal a buai phah tih a sawi.
Kerch Bridge tia an sawi bawk hi Russia-in kum 2014-a peninsula rûna a luah hnua dawn a ni a. Russian President Vladimir Putin-a’n kum 2018 khan hawngin van sang leh tuipui atanga beihna laka him tura venhimna khauh taka dah a ni.
Russian lam tang thenkhat chuan lei hi drone-in a fuh avang ai mahin a tla keh darh puak vel avanga chhia niin an sawi a. Ukraine chuan engmah sawi a la nei lo.
Ukrainian drone-te hian chhim lam Krasnodar region-a Ilsku-a tuialhthei thlitfiman telin energy hmun hrang hrang a fuh bawk a. Ilsky-ah hian drone keh darhin kangmei tichhuakin naupang telin mi parukin hliam an tuar.
Kar hmasa khan President Volodymyr Zelensky-a chuan Russia hi Ukraine-a leite tichhiaa Dnipro River lehlam lehlama awm ‘Ukraine then tumin… mite tana khawsak harsatna thlen a tum’ tiin a lo puh tawh.
Palai lawkte inbiain US palai, Jared Kushner-a leh Steve Witkoff-a ten Putin-a leh Zelensky-a te an biak ve ve hnuah pawh muanna a la hla rih hle.
Moscow chuan Ukraine hi an ram pe then tur leh Nato member nih an tumna titawp mai tawh turin an phut a. Kyiv-in hei hi a la pawm thei lo va, indo a zawh hnuah an himna tur an ngaihtuah bawk a, inremna a la awm thei lo.