Uttar Pradesh assembly inthlan lo awm turah Akhilesh Yadav-a kaihhruai, Samajwadi Party (SP) nena dinna tur bial insem dan tur inbiakna chu Congress atangin Priyanka Gandhi-i’n a ho dawn nia sawi a ni.
Congress hruaitu lawkte leh Uttar Pradesh-a an party hruaitute chu Thawhtanni khan 10, Rajaji Marg, Delhi-ah inthlan lo awm tur sawihovin an thukhawm.
Congress chief Mallikarjun Kharge-a leh Rahul Gandhi-a te chuan UP-in charge Rajendra Pal Gautam-a UP Congress working president, MP Imran Masood-a te chu party thawhhona kaihhnawihah chanchinbu mite hmaah thil sawi tam lo turin an chah nia sawi a ni.
Uttar Pradesh hi kum thar tir lama inthlang tur an ni.
Kharge-a chuan X-ah UP mipuiten term hnih sorkar chelh tawh, BJP chu thlak an duh a, intluktlanna, mi tinin inrualkhaia an awm theihna tur an duh avangin an paih thla dawn niin a tar lang.
“Vawiin khan Uttar Pradesh Congress Committee-a an hruaitu liante nen assembly inthlan lo awm tur kan sawiho va. Uttar Pradesh inthlan hi ram politic-in hawi thar a neihna tur a ni a. State mipuiten inthlak danglam an duh tawh a ni,” tiin a tar lang.
Kum 2024 Lok Sabha inthlana Uttar Pradesh bik result sawi chhuakin Gandhi-a thawhpui hnai, Congress MP KC Venugopal-a chuan INDIA tangrualten BJP an hneh dawn tih a sawi bawk.
SP hian Lok Sabha inthlan hnuhnung berah khan bial 37 an la a, BJP-in 33 chauh an la.
“Kum 2024 Lok Sabha inthlan ang bawkin INDIA-a kan thawhpuite nen Uttar Pradesh-ah hian BJP kan hneh dawn a. Uttar Pradesh mipuite hian BJP khawlpui pahnih hmangin an khawtlang nun leh eibar an tichhia tih an hria a, a hma thei ang bera paih thlak a ngai tih an hria a. Uttar Pradesh atang hian BJP insasengin thla rei lo te hnuah ram pum politic kal zel dan tur a lang dawn a ni,” tiin X-ah a tar lang.
MP Masood-a chuan an party chuan campaign chu December chawlhkar hmasa berah Congress chief Kharge-a hovin vantlang inkhawm leh kawng zawhin an tan dawn tih a sawi.
Thawhtanni vek khan SP chief Yadav-a chuan INDIA tangho zingah dinna bial insem dan tur sawiho a la awm lo tih a sawi a, inthlan chuh turin tanghote hi an inlungrual tih a sawi bawk.
Thuthar lakhawmtute hnenah Yadav-a chuan tanghote hian beihpui an thlaknaah inzahtawn leh an candidate-te chakna milin an kalpui dawn tih a sawi.
“Bial insem dan tur sawiho a la ni lo va, INDIA hian a huhovin kan bei dawn a. Inzahtawn tak chungin kan insiam rem dawn a, candidate tha ber berin an chuh dawn a ni,” a ti.
Kar kal ta Ningani khan Uttar Pradesh-ah hian All India Majlis-e-Ittehadul Muslimeen (AIMIM) chief Asaduddin Owaisi-a leh Azad Samaj Party (Kanshi Ram) chief Chandrashekhar Azad-a te chuan tangho thar, Samajik Parivartan Morcha an din tawh a, NDA ni lo, INDIA pawh ni chuang lo pawl a ni ang.
Anni hian Azad-a chu chief minister atan an vawrh chhuak dawn a, bial 403 awm chuh vek an tum.
Hruaitu pahnihte hian SP, Congress leh party dangte chu an zinga tel ve turin an sawm a, ‘chu chu a term thun nana BJP thuneihna chang leh tur danna tur a ni’ tiin an sawi.