BJP-in PRASHAD hmanga sak hmun hnih en

Aizawl: BJP Mizoram Central Scheme Monitoring & Publicity Cell chuan an Chairman leh State Vice President Lalduhawma Pachuau hovin, Central sorkar Pilgrimage Rejuvenation & Spiritual Heritage Augmentation Drive (PRASHAD) Scheme kaltlanga Chite Venga sak mek Convention Centre leh Aizawl Haat hnathawh mekte a hmunah kalin Nilaini khan an enfiah.

Hmunhma an tlawhnaah hian Lalduhawma Pachuau chuan Aizawl Haat chu peihfel a ni tep tawhin a sak dan a tha hle tih sawiin, Convention Centre erawh a sak dan a that tawk loh avangin rilru a na tih a sawi a. Zaa za central funding hmanga sak, Mizoram rohlu tur project-te chu state sum hman ngai lo a nih avangin state sorkar pawhin uluk taka enpuiin tun aia chak zawkin hma la se a duh thu a sawi bawk.

Lalduhawma chuan kum 2014-15 atanga kalpui tan, Ministry of Tourism hnuaia PRASHAD scheme hi India-a hnam leh sakhuate inpumkhatna atan leh khualzinten hnam leh sakhaw hmun pawimawhte an tlawh awlsam zawk nana ruahman a nih thu a sawi a. Scheme hnuaiah hian kawng, parking, tui thianghlim, inthiarna thianghlim, waiting hall, electric eng leh CCTV thlenga ruahman tel a nih thu sawiin, Mizoram mipuiten he scheme thatna hi hriaa chhawr tangkai tum turin a chah.

Leave a Reply

error: Content is protected !!