Aizawl: Planning & Programme Implementation Department hnuaia Mizoram Startup Mission (MSUM)-in Raising and Accelerating MSME Performance (RAMP) Scheme hnuaia Green Initiative kaltlanga a buatsaih ‘Green Verified Business Certificate’ semna leh ‘Mizoram Kailawn 5.0’ tlangzarhna hun chu Nilaini khan McCabe Hall, Aijal Club, Aizawlah Tourism Minister Lalnghinglova Hmar chuan a hmanpui.
Minister Lalnghinglova Hmar chuan tourism sector-in Mizoramah hmasawnna lian tak a thlen theih thu leh, state dangte laka danglamna thlen turin Green Initiative hi ruahman a nih thu a sawi a. Za zela 85 lai ram ngaw nei Mizoram thing leh maute humhalh zel a nih theih nan hmasawnna kawng hrang hrangah sustainable development zawnga kalpui turin kalkhawmte chahin, Environment & Forest Department leh Tourism Department tangkawpin MoU an ziah thu leh Winter Festival leh Tlaizawng Festival lo awm turte pawh Green festival ni tura hmalak mek a nih thu a sawi bawk.
Sumdawnna kalpui mekten environment humhalh an ngaih pawimawh zual nana siam ‘Green Verified Business Certification’ atan hian tehfung pariat — waste & material management, water management, energy use, local & sustainable sourcing, food & kitchen innovation, homestay/tourism practices, behaviour & awareness leh out-of-the-box practices hman niin, za zela 70 aia sang hmu chinte chu a hmuna endik an nih hnuah certificate hi pek an ni.
Kum 2017-a bul tan ‘Mizoram Kailawn’ edition thar ‘Mizoram Kailawn 5.0’ ah hian a hmaa grant pek dan kalphung thlakin, sumdawnna bul la tan chiah lo leh ngaihtuahna tha tak neite tan intihsiakna hmanga kalpui a ni dawn a, Green Entrepreneurship ngaihpawimawh zual a ni ang.