Aizawl: Mizoram Lokayukta Act, 2014 bung 47-nain a phut angin, Mizoram Lokayukta Chairperson Lalmalsawma chuan Larsap General (Dr) Vijay Kumar Singh hnenah Mizoram Lokayukta Annual Report pasarihna chu Nilaini khan a thehlut a, April 1, 2025 atanga March 31, 2026 inkar huam he report hi Mizoram Legislative Assembly thutkhawmah pharh a ni ang.
Report thehluhna hunah hian Chairperson Lalmalsawma leh amah tawiawmtu member Lalsanglura leh member (Judicial) Joel Joseph Denga te chuan Lokayukta hmalakna tlangpui, thubuai chinfel tawh dante leh dik leh langtlang zawka rorelna kalpui zel dan turte larsap an hrilhfiah.
Annual Report pasarihnain a tar lan danin, kum 2025-2026 chhung khan thubuai lut thar 18 awmin case 15 chu preliminary inquiry tura ziah luh a ni a, chung zinga case pathum chu Anti-Corruption Bureau kutah leh case 12 chu Lokayukta Inquiry Wing kutah hlan niin, thubuai 12 chinfel tawh a ni.
March, 2019-a Mizoram Lokayukta din a nih atanga nimin thlengin thubuai 101 ziah luh tawh zingah case 74 chu preliminary inquiry tura ziah luh niin, chhui chian turin case 37 ziah luh a ni a; court-a prosecution tura thehluh 17 awm tawhin case 52 khar fel a ni tawh bawk.
Eirukna thubuai hi engtik lai pawhin a thlawn vekin MINECO-a Mizoram Lokayukta pisaah lehkha ziakin emaw, email (Mizoram.lokayukta@mizoram.gov.in) kaltlangin emaw a thlen theih reng a, mahni nihna thup duhte tan thup sak zel niin biakpawh theihna tur erawh tar lan tel tur a ni.