Infiam mite tan sorkara luhna a inhawng zau tawh – Sports minister

Aizawl: Sports Minister Lalnghinglova Hmar chuan infiammite tan a hma aiin sorkar hnaa luhna kawng a inhawng zau tawh tih a sawi.

Mizo Zirlai Pawl (MZP) leh Mizoram Volleyball Association (MVA) tangkawp buatsaih, Inter-Higher Secondary School Volleyball Tournament, 2026 final leh kharna inkhawm chu Nilaini zan khan Aizawl West Jt. YMA Hall-ah neih a ni. Sports & Youth Services Minister Lalnghinglova Hmar chuan khuallian niin a hmanpui.

Lalnghinglova Hmar chuan infiammite tan a hma aiin sorkar hnaa luhna kawng a inhawng zau tawh tih sawiin, tun hnaia Excise Constable laknaah pawh physical efficiency test leh written exam-in mark inang a put tak avangin lehkha thiamna piah lamah tlan chak leh zuan san te’n awmzia a nei tawh a, infiammi eng emaw zat lak thar an ni tih a sawi.

Mizoramah ‘fitness culture’ chawi lar zel tum a nih thu sawiin sports minister chuan, “Aizawl International Half Marathon-ah mi 3,000 chuang an tlan chuan khawpui leh thingtlangah hriselna ngaih pawimawhna a thang zel tih a tichiang a ni,” a ti a. December 15 zanah Winter Festival khuhhawn nan ‘Winter Run Mizoram’ buatsaih a ni dawn tih a sawi bawk.

MZP President C. Lalremruata pawhin thu sawiin, tournament chu zirlaite zinga inelna thianghlim a awm theih nan leh zirlaibu pawna thiamna (co-curricular education) kalpuina atana buatsaih a nih thu a sawi a, zirlaite chu ruihhlo laka inthiarfihlim tur leh ruihhlo dotute tha tichaktu ni turin a chah a ni.

Leave a Reply

error: Content is protected !!