Larsapin SIC thar la lut

Aizawl: Larsap General (Dr) Vijay Kumar Singh (Retd) chuan Lok Bhavan-a Durbar Hall-ah rinawmna thutiam chham tirin C. Zothankhuma, IDAS (Retd) chu Mizoram State Information Commission (MSIC) hnuaia State Information Commissioner thar atan Ningani khan a la lut.

Lakluh inkhawmah hian Chief Secretary mawhphurhna la mektu Sudhir Kumar, IAS chuan larsap-in State Information Commissioner atana C. Zothankhuma a ruatna notification a chhiar chhuak hmasa a, hemi hnu hian larsap chuan rinawmna thu a tiam tir a ni.

He hunah hian Chief Minister Lalduhoma, PWD Minister Vanlalhlana, Rural Development & Administration Minister Prof. Lalnilawma, Chief Minister Adviser Lalmuanpuia Punte, MLA; Lok Sabha MP Richard Vanlalhmangaiha, sorkar mi pawimawh dangte leh chhungkhat lainate an tel.

State Information Commissioner atana lakluh tak C. Zothankhuma hi Mizo ziakmi hriat hlawh tak C. Chhuanvawra fapa niin December 17, 1966 khan a piang a, M.A., LLB leh BCS degree neiin kum 1991 khan Indian Defence Accounts Service (IDAS) a zawm a. September 30, 2026 khan Additional Controller General of Defence Accounts (CGDA), New Delhi a chelh laiin superannuation pension-in a chhuak.

A thawh hun chhung hian India ram hmun hrang hranga Defence Accounts Department office hrang hrang endikna mawhphurhna a chelh thin bakah pension kaihhnawih tiam lova vuivaina awmte ngaihtuahtu a ni thin bawk.

C. Zothankhuma hi hian lehkhabu panga a ziak tawh a. An chhungkuain Tuikhuahtlang, Aizawlah an cheng mek a ni.

Leave a Reply

error: Content is protected !!