Kolasib leh Hailakandi district thuneituten ramri chungchang sawiho

Aizawl: Kolasib leh Hailakandi district thuneitute chuan Ningani khan Buhchangphai-ah ramri chungchang leh thawhhona tha zawk neih dan tur sawi ho vin, inremna lo awm sa anga ramri dinhmun pangngai (status quo) chu vawn nun zel an rel.

He inhmukhawmnaah hian Kolasib District Bawrhsap H. Dolianbuaia leh SP Lalrinpuia Varte bakah Hailakandi District Bawrhsap Jay Vikas leh Sr. SP Amitava Sinha te, district pahnih Forest DFO-te leh official pawimawh dangte an tel a. Ramngaw chhunga dan lova oil palm leh kuhva chin te, mi mal kawng laih leh thil dang sak (infrastructure)-te chu khap a nih thu sawiin, Forest Conservation Act, 1980 bawhchhiatna a thlen loh nan a kaihhnawih thuneituten hma an la nghal zel dawn tih an rel a ni.

Ramjani nallah leh Inner Line Reserve Forest (ILRF), Assam lam panna lei leh culvert pahnih siam chungchanga dodalna awm chu a kaihhnawih thuneituten dan angin ching fel rawh se, an ti bawk.

Ramri venhimna leh thawhhona tihchak nan Mizoram Forest, Assam Forest leh Assam Police-te tangkawpin joint patrolling neih thin nise an ti a, Mizorama thar chhuah kuhva-te harsatna awm lova phurh chhuah a nih theih dan tur pawh ngaihtuahin chinfel dan tha zawk zawn nise an ti bawk.

Ruihhlo tawlh ruk do kawngah district pahnihte tangkawpa NCORD protocol anga hma lak ho zel an rel bakah, inbiakpawhna leh thuthar inhriattawn zung zung nan WhatsApp group siam leh a khat tawka hmaichhan leh online hmanga inhmukhawm thin turin an inrem a ni.

Kolasib Bawrhsap leh SP-te hi Addl. SP Laltluangliana leh DFO ten an tawiawm a ni.

Leave a Reply

error: Content is protected !!