Aizawl: Special Monitoring Committee on Aizawl Bypass Road on the Western Side chuan Ningani khan kawngpui siam hna kal mek chu a hmunah kalin an endik a, hnathawh chin a lawmawm rualin duh anga a chak tawk loh avangin chak lehzuala hma la turin contractor-te an hriattir.
Chief Minister Adviser TBC Lalvenchhunga kaihhruai he committee-ah hian Planning Secretary, PWD Engineer-in-Chief, Environment, Forest & Climate Change PCCF, Land Revenue & Settlement Director leh Aizawl DC te an tel a ni.
Chairman TBC Lalvenchhunga chuan hna a len tham avang leh department hrang hrang thawkho tura a tul avangin sorkarin he committee hi a din thu sawiin, contractor-in hmanrua an chhawp tam tawk loh avangin hna a chak tawk lo tih a sawi a, project enkawltu PWD hnuaia Project Implementation Unit (PIU) chu ngawrh lehzuala endik turin a chah bawk.
Ministry of DoNER hnuaia PM-DevINE scheme atanga sum hmuh, Rs vaibelchhe 500 senga siam tur km 45-a thui he kawngpui hi Mizoram PWD-in a thawk a, Ghaziabad, Uttar Pradesh-a awm RG Buildwell chu EPC mode-a hna thawktu an ni. January 2025-a hna tan tawh he project-ah hian tun dinhmunah physical progress chu za zelah 33.61 leh financial progress chu za zelah 31.49 a tling tawh a ni.
Mizoram PWD kawng project zinga sum tam berna, Aizawl khawpui kaltlang lova ATL Road leh Lengpui kawng thlunzawmtu tur bypass road a ni.