Mizo hming hawha hnam dangin sumdawnna an kalpui thin dan kalh a ni, hma la dawn – MCCI

Mizoram Chamber of Commerce & Industries (MCCI) chuan Mizo hming hawha hnam dang sumdawngten sumdawnna an kalpui thin chu dan kalh a nih thu sawiin, tun atanga thla hnih chhungin hma lak tan an tum tih an sawi.

Ningani khan Aizawl Press Club-ah chanchinbumite kawmin MCCI President K. Lalhmingthanga chuan kum 1988-a siam, Benami Transaction Act chu Mizoramah pawh pawm tawh a nih thu leh chak taka kalpui a hun tawh thu a sawi.

Hnam dang sumdawngten Mizo hming an hawh thin hian Mizo sumdawng dik takte a tihchhiat thin avangin hma lak an tum a; mahse, hremna pek dan tur erawh a hunah an la puang chauh dawn tih a sawi.

MCCI chuan Scheduled Tribe-te income tax awl an nih chunga bank thenkhatin Income Tax Return (ITR) file tura an nawr thin chu an duh loh thu leh tribal entrepreneur-te zaa za neitu company leh partnership-te pawh tax awl tura central-ah an thlen tawh thu an sawi a. Thingtlang miten minor forest produce an hralh atanga economy a than len nan Forest Rights Act, 2006 bawhzui an tum thu leh Mizoram rel station emaw, airport hnaihah emaw dry port siam tura sorkar laipui an ngen thu an sawi bawk.

Hmarcha ro leh aieng ro-a 5% GST lak thin tihtawp an ngen thu leh registration nei lo hnam dang sumdawngte dawr lo tura mipui an ngen thu an sawi a. Central department-ten state chhung thil siam an lei tam zawk nan NSIC nen tangkawpin Lunglei leh Champhai-ah vendor development programme buatsaih an tum thu K Lalhmingthanga’n a sawi.

MCCI Vice-President Lianzuala chuan, “Hnam dang sumdawng tam takin Mizo hming an hawh a, Mizoram chhunga sumdawnna an kalpui thin. Hei hi danin a phal loh a ni a, Mizo sumdawng dik takte tan pawh a pawi hle. Mizo hming hawha hnam dang sumdawngte chu lo infihlim se, tun atanga thla hnih chhungin hma lak tan kan tum a ni,” a ti.

Leave a Reply

error: Content is protected !!