Congress-in Pathiannia CM-in Ropuiliani lim a hawn dem

Aizawl: MPCC chuan Chief Minister Lalduhoma’n Pathiannia Kelsih-a Ropuiliani lim a hawng chu na taka demin Pathianni serh tura ngen chungin thil hawn programme-te Pathiannia ruahman tawh lo turin chief minister an ngen.

Ningania Aizawl Press Club-ah chanchinbu mite kawmin MPCC Media & Publicity Board Chairman PC Laltlansanga chuan November 15, Pathianni khan Prime Minister Narendra Modi-a’n Kelsih-a Ropuiliani Tribal Freedom Fighters Museum leh Zawlnuam-a Eklavya Model Residential School a hawn rualin Pangzawl South-a Eklavya Model Residential School sakna tur lungphum a phum a sawi a. Hemi rual hian Chief Minister Lalduhoma pawhin Kelsih-a Ropuiliani lim a hawng ve tih a sawi.

“Kristiante ni serh, Pathianni taka chief minister berin lim a hawng chu kan dem tak zet a, Ropuiliani lim hawn hun atan ni dang ruat ni zawk se a tha kan ti hle,” PC Laltlansanga’n a ti.

PC Laltlansanga chuan chief minister-in Pathiannia programme a neih avangin amah zuitu leh sorkar official thahnem takin Pathianni an bawhchhiat phah chu pawi an tih thu sawiin, tun hnuah chuan sorkarin Pathiannia thil hawn programme siam tawh lo turin an ngen tih a sawi.

Lalduhoma chu Kristian ram chief minister mai ni lovin kohhran upa a nih thu leh rinna humhimtu tur bera ngaihin sakhaw ni pawimawh a palzam chu vanduaithlak an tih thu sawiin PC Laltlansanga chuan, “Pathianni chu Mizoram mipui tam zawkte sakhaw ni pawimawi tak, Pathian chibai buk ni a nih avangin, India danpui hnuaia sakhaw zalenna tibuai thei zawnga ruahmanna siam thin chu en liam mai chi a ni lo,” a ti bawk.

Leave a Reply

error: Content is protected !!