AZL: Mara Autonomous District Council (MADC) hnuaia Member of District Council (MDC) seat 25 atana inthlanpui buatsaihah polling station 81-ah nimin khan mipuiten tluang takin vote an thlak.
MADC huam chhunga mipuiten zing dar 7 atanga tlai dar 5 inkar vote thlak hun hawn a ni a, tlai dar 5-a polling area-a awm chinte chu vote thlaktir vek an ni.
Nimin tlai dar 5 thleng khan vote tla hi 53.80% a tling tawh a, Tokalo bial chu vote tlak thatna ber niin 81.44% a tla a ni.
Polling station hrang hrang tlawh kualtu Siahaa thuthar thehdarhtute chuan buaina leh harsatna thleng lian tham thleng a awm lo tih an sawi a, vote thlakna, Electronic Voting Machine (EVM) pakhat thlak a ngai tih lo chu khawl chhia a awm lo tih an sawi.
Tun tuma MADC inthlanpui neih hi tum danga inthlan aiin a boruak a muanawm zawk nia an hriat thute Siahaa thuthar thehdarhtute chuan an sawi a ni.
Tar lan tawh thin angin, he inthlannaah hian MNF party chuan seat awm zawng zawng an chuh a, BJP-in seat 24, ZPM-in seat riat leh independent candidate pali an awm a. Vote tlate hi karleh Thawhtanni, tun thla ni 9-ah chhiara hemi ni hian result pum pui hriat theih beisei a ni.